തുറവൂര്: കുത്തിയതോട് സബ് ട്രഷറി പരിമിതികളില് നട്ടം തിരിയുന്നു. അധികൃതര് അവഗണിക്കുന്നതായി പരാതി. പ്രായമേറിയവരുള്പ്പെടെ ആയിരക്കണക്കിന് പേരാണ് ദിവസേന ഇവിടെയെത്തുന്നത്.
വേണ്ടത്ര സൗകര്യങ്ങള് ഒരുക്കാതെ അധികാരികള് മുഖംതിരിക്കുന്നതായാണ് വിമര്ശനം. ഇടുങ്ങിയ കെട്ടിടത്തിലാണ് സ്ഥാപനം പ്രവര്ത്തിക്കുന്നത്. നിന്ന് തിരിയാനുള്ള ഇടം ഇവിടില്ല. അഞ്ച് പഞ്ചായത്തുകളിലായി എഴുപതോളം സര്ക്കാര് സ്ഥാപനങ്ങളും അയ്യായിരത്തിലധികം പെന്ഷന്കാരുമാണ് സ്ഥാപനത്തിന്റെ പരിധിയില് പെടുന്നത്.
ഇവിടെയെത്തുന്ന സ്ത്രീകളടക്കമുള്ള ഗുണഭോക്താക്കള്ക്ക് പ്രാഥമിക കൃത്യങ്ങള് നിര്വഹിക്കാനുള്ള സൗകര്യം കെട്ടിടത്തിലില്ല. ശമ്പളം, പെന്ഷന് എന്നിവ വിതരണം ചെയ്യുന്ന മാസാദ്യങ്ങളിലാണ് തിരക്ക് ഏറെ അനുഭവപ്പെടുന്നത്.
രാവിലെ എത്തുന്നവര് പലപ്പോഴും വൈകുന്നേരമാണ് മടങ്ങുന്നത്. തിരക്കുള്ള സമയങ്ങളില് ഇവിടെയെത്തുന്നവരുടെ നിര സമീപത്തെ കനാലിന്റെ അരികുവരെ നീളുന്ന സ്ഥിതിയാണ്.
ട്രഷറിയിലെത്തുന്നവരുടെ ദുരിതത്തിന് പരിഹാരമേകാന് കുത്തിയതോട് പഞ്ചായത്ത് വര്ഷങ്ങള്ക്കു മുമ്പ് ദേശീയ പാതയോരത്ത് എന്സിസി കവലക്കു സമീപം കെട്ടിടം നിര്മിക്കാന് സ്ഥലം അനുവദിച്ചിരുന്നെങ്കിലും തുടര്നടപടികളുണ്ടായിട്ടില്ല.
കെട്ടിടം നിര്മിച്ച് ട്രഷറിയുടെ പ്രവര്ത്തനം ഇവിടേയക്ക് മാറ്റണമെന്നാണ് പെന്ഷന് സംഘടനകളുടെ ആവശ്യം.
