കൊച്ചി: നഗരസഭ റവന്യൂ ഉദ്യോഗസ്ഥനെ മര്ദിച്ചെന്നാരോപിച്ച് ജീവനക്കാര് നടത്തിയ പണിമുടക്ക് അവസാനിപ്പിച്ചു. മേയറുടെ സാന്നിധ്യത്തില് നടന്ന അനുരഞ്ജന ചര്ച്ചയെ തുടര്ന്ന് റവന്യൂ വിഭാഗത്തിലെ ഉദ്യോഗസ്ഥനായ പ്രതീഷ് ബാബുവിനെ ലീഗ് കൗണ്സിലര് കയ്യേറ്റം ചെയ്തതിന്റെ പേരില് നടത്തിവന്ന സമരത്തില് നിന്ന് ജീവനക്കാര് പിന്മാറി. നഗരസഭയിലെ ജീവനക്കാരനെ മര്ദിച്ച കൗണ്സിലര് ടി.കെ. അഷ്റഫിനെതിരെ ജാമ്യമില്ലാ വകുപ്പ് പ്രകാരം പൊലീസ് കേസെടുത്തു. കൗണ്സിലറുടെ പരാതിയില് പ്രതീഷ് ബാബുവിനെതിരെയും കേസെടുത്തതായി സെന്ട്രല് സ്റ്റേഷന് സിഐ അനന്തലാല് പറഞ്ഞു.
സുലൈമാന് ഖാലിദിന്റെ മകള് സഫിയയുടെ കൃഷ്ണസ്വാമി റോഡിലെ വീട്ടില് അനധികൃതമായി നിര്മ്മിച്ച കെട്ടിടത്തിനെതിരെ പിഴ ചുമത്തിയതുമായി ബന്ധപ്പെട്ട കാര്യം സംസാരിക്കുന്നതിനായി കഴിഞ്ഞ ദിവസം ഉച്ചയ്ക്ക് ടൗണ് പ്ലാനിംഗ് കമ്മിറ്റി അധ്യക്ഷയുടെ മുറിയിലേക്ക് കമ്മിറ്റിയിലെ അംഗം കൂടിയായ അഷ്റഫ് തന്നെ വിളിച്ചു വരുത്തിയതായി പ്രതീഷ് പറഞ്ഞു. ഫയല് കാട്ടി താന് കാര്യങ്ങള് വിശദമാക്കിയെങ്കിലും അനധികൃതമായ ഒട്ടേറെ കെട്ടിടങ്ങള് ഉണ്ടായിട്ടും ഈ കെട്ടിടത്തിനെതിരെ മാത്രം തിടുക്കപ്പെട്ടു നടപടിയെടുത്തതെന്തിനെന്ന് ചോദിച്ച് അഷ്റഫ് തട്ടികയറുകയും അസഭ്യം പറയുകയുമായിരുന്നു. ഡ്യൂട്ടി സമയം കഴിഞ്ഞു പുറത്തു വരുമ്പോള് കാണിച്ചു തരാമെന്നു ഭീഷണിപ്പെടുത്തി കഴുത്തില് പിടിച്ചു തള്ളി, പ്രതീഷ് പറഞ്ഞു. തുടര്ന്ന് ഇദ്ദേഹം എറണാകുളം ജനറല് ആശുപത്രിയില് അഡ്മിറ്റായി. എന്നാല് പ്രതീഷ് തന്നെ മര്ദിക്കുകയാണ് ചെയ്തതെന്നും ഇതിനെതിരെ പരാതി നല്കിയിട്ടുണ്ടെന്നും ടി.കെ അഷറഫ് പറഞ്ഞു.
കൗണ്സിലര് ജീവനക്കാരനെ മര്ദ്ദിച്ചതില് പ്രതിഷേധിച്ച് സംയുക്ത യൂണിയനുകള് പണിമുടക്കിയതോടെ ഉച്ചയ്ക്കു ശേഷം നഗരസഭ ഓഫീസ് പ്രവര്ത്തനം സ്തംഭിച്ചു. മേയറുടെ നേതൃത്വത്തില് ചര്ച്ച നടത്തിയെങ്കിലും തീരുമാനമായില്ല. തുടര്ന്നാണ് ഇന്നലെ വീണ്ടും ചര്ച്ച നടന്നത്.
