പള്ളുരുത്തി: ബിനാലെയുടെ പ്രചരണാര്ത്ഥം യാത്രാ ഓട്ടോകളില് ഘടിപ്പിച്ച ഉഗ്രശബ്ദമുള്ള ഹോണുകള് പിന്വലിക്കാന് ഫോര്ട്ടുകൊച്ചി സബ്ബ് കളക്ടര് നിര്ദേശിച്ചു. പൊതുജനങ്ങള്ക്ക് ശല്ല്യമാകുന്ന തരത്തില് ഓട്ടോറിക്ഷകളിലെ ഹോണുകള് മാറുന്നതിനെക്കുറിച്ച് ജന്മഭൂമിവാര്ത്ത പ്രസിദ്ധീകരിച്ചിരുന്നു.
മട്ടാഞ്ചേരി ജോ: ആര്ടിഒയ്ക്ക് നിരവധി പരാതികള് ഇതേക്കുറിച്ച് ലഭിച്ചിരുന്നുവെങ്കിലും സര്ക്കാര് സ്പോണ്സര് പരിപാടിയായി ബിനാലെ അരങ്ങേറുമ്പോള് ഉദ്യോഗസ്ഥരുടെ ഇടപെടലുകള് തങ്ങള്ക്ക് വിനയാകുമെന്ന ധാരണയില് മോട്ടോര് വാഹന വകുപ്പ് അധികൃതര് നടപടികളില് നിന്നും ഒഴിഞ്ഞുമാറുകയായിരുന്നു. എന്നാല് പൊതുജനപരാതി ഏറുകയും, നാട്ടുകാര് അമിത ഹോണ് ഘടിപ്പിച്ച ഓട്ടോറിക്ഷകളുമായി നിരന്തര സംഘര്ഷം ഉടലെടുക്കുന്ന സാഹചര്യത്തിലാണ് മാധ്യമങ്ങള് സംഭവത്തില് ഇടപെട്ടത്.
ജായിന്റ് ആര്ടിഒ സബ്ബ് കളക്ടറെ സംഭവത്തിന്റെ ഗൗരവം ബോധിപ്പിക്കുകയായിരുന്നു. തുടര്ന്ന് ബിനാലെ സംഘാടകരോട് വാഹനങ്ങളിലെ ഹോണ് നീക്കാന് സബ്ബ് കളക്ടര് ഡോ: അദീല അബ്ദുള്ള കര്ശന നിര്ദ്ദേശം നല്കി. സിറ്റി പരിധിയില് 80 ഡെസിബിള് ശബ്ദത്തില് കൂടുതല് പ്രവര്ത്തിക്കാന് പാടില്ലെന്ന നിയന്ത്രണം നിലനില്ക്കുമ്പോഴാണ് 100, 120 ഡെഡിബിള് ശബ്ദത്തില് ബിനാലെയുടെ ഹോണ് പ്രവര്ത്തിച്ചിരുന്നത്. ഇതേ ഹോണുകള്ഉപയോഗിക്കുന്ന വാഹനങ്ങള് പിടിച്ചെടുക്കുമെന്ന് ജോയിന്റ് ആര് ടി ഒ അനന്ത കൃഷ്ണന് ജന്മഭൂമിയോട് പറഞ്ഞു.
