കല്‍പ്പറ്റ : മാലിന്യം നിക്ഷേപിക്കുന്നവര്‍ക്കെതിരെ കടുത്ത നടപടികള്‍ സ്വീകരിക്കുമെന്ന അധികാരികളുടെ വാക്കിന് പുല്ലുവില മാത്രം. വയനാട്ടില്‍ പാരിസ്ഥിതിക പ്രദേശങ്ങളിലടക്കം മാലിന്യം നിക്ഷേപിക്കല്‍ നിര്‍ബാധം തുടരുന്നതായാണ് റിപ്പോര്‍ട്ടുകള്‍. യുവമോര്‍ച്ചയുടെ നേതൃത്വത്തില്‍ നടന്ന സമരത്തെതുടര്‍ന്ന് മാലിന്യം നിക്ഷേപിക്കുന്നവര്‍ക്കെതിരെ കടുത്ത നടപടികള്‍ സ്വീകരിക്കുമെന്നാണ് അധികൃതര്‍ ജനങ്ങള്‍ക്ക് നല്‍കിയ ഉറപ്പ്. എന്നാല്‍ അതിനുശേഷമാണ് ആശുപത്രി മാലിന്യവുമായെത്തിയ ലോറി വയനാട്ടുകാരെയാകെ ദിവസങ്ങളോളം അസ്വസ്ഥരാക്കിയത്. തുടര്‍ന്ന് അധികാരികളുടെ ഒത്താശയോടെ വയനാട്ടുകാരുടെ പ്രതീക്ഷയായ മെഡിക്കല്‍ കോളേജ്‌നിര്‍മ്മാണ സ്ഥലത്ത് കൊണ്ടുപോയി മാലിന്യം നിക്ഷേപിക്കുകയാണുണ്ടായത്.
കഴിഞ്ഞദിവസങ്ങളില്‍ കുറ്റിയാടി പക്രന്തളം ചുരത്തില്‍ വ്യാപകമായ രീതിയില്‍ മാലിന്യ നിക്ഷേപിക്കപ്പെട്ടു. ചുരത്തിന്റെ ഇരുവശങ്ങളിലുമായി ചാക്കില്‍ കെട്ടി ടണ്‍ കണക്കിന് മാലിന്യമാണ് തള്ളിയിരിക്കുന്നത്. പ്രദേശമാകെ ദുര്‍ഗന്ധം വമിക്കുന്നതുമൂലം ഇതുവഴി യാത്രചെയ്യാന്‍ പറ്റാത്ത സ്ഥിതിയാണുള്ളത്. അധികാരികള്‍ ഇനിയും കണ്ണുതുറക്കാന്‍ വൈകിയാല്‍ അതീവ പരിസ്ഥിതിലോല പ്രദേശമായ പക്രന്തളം ചുരവും പ്രദേശവും നാശത്തിലേക്ക് നീങ്ങുമെന്ന കാര്യത്തില്‍ സംശയമില്ല.
നിരവധി പ്രതിഷേധങ്ങള്‍ ഉയര്‍ന്നിട്ടും അയല്‍ സംസ്ഥാനങ്ങളില്‍നിന്നും അയല്‍ ജില്ലകളില്‍ നിന്നുമെല്ലാം മാലിന്യം വയനാട്ടിലെത്തുന്നത് ഉദ്യോഗസ്ഥരുടെ ഒത്താശമൂലമാണെന്നാണ് ജനസംസാരം.
പ്രതികരിക്കാൻ ഇവിടെ എഴുതുക: