കണ്ണൂര്: ജില്ലാ ആയുര്വ്വേദ ആശുപത്രിയെ സര്ക്കാരിന്റെ ആര്ദ്രം പദ്ധതിയിലുള്പ്പെടുത്തി മികവിന്റെ കേന്ദ്രമാക്കുമെന്ന് ആരോഗ്യമന്ത്രി കെ.കെ.ശൈലജ. ഇവിടെ സിദ്ധ വിഭാഗത്തിന്റെയും മിഴി പദ്ധതിയുടെയും ഉദ്ഘാടനം നിര്വ്വഹിച്ച് സംസാരിക്കുകയായിരുന്നു മന്ത്രി. ആശുപത്രികളെ രോഗി സൗഹൃദമാക്കുകയും ആധുനിക സൗകര്യങ്ങളോടെയുള്ള ചികില്സ ലഭ്യമാക്കുകയും ചെയ്യുകയെന്നതാണ് ആര്ദ്രം മിഷനിലൂടെ സര്ക്കാര് ലക്ഷ്യമിടുന്നത്. ഇതിന്റെ ഭാഗമായി ഫ്രന്റ് ഓഫീസും ഒപി സംവിധാനവും ഇലക്ട്രോണിക്വല്ക്കരിക്കും. ഈ പദ്ധതികള് ആയുര്വേദ ആശുപത്രികളിലും നടപ്പാക്കുമെന്നും മന്ത്രി പറഞ്ഞു. മനുഷ്യന്റെ കാലങ്ങളായുള്ള അനുഭവജ്ഞാനത്തിലൂടെ ആര്ജിച്ച അറിവാണ് ആയുര്വേദം. ശാസ്ത്രവും പരീക്ഷണശാലകളും വരുന്നതിനു മുമ്പുതന്നെ നൂറ്റാണ്ടുകളായി ജീവിതാനുഭവങ്ങളിലൂടെ വികസിച്ചുവന്ന ചികില്സാ സമ്പ്രദായമെന്ന നിലയില് ആയുര്വേദം അമൂല്യമാണെന്നും അവര് പറഞ്ഞു. ആയുര്വേദ അറിവുകളെ ശാസ്ത്രീയ ഗവേഷണങ്ങള്ക്കും പഠനങ്ങള്ക്കും വിധേയമാക്കിയാണ് നിലവില് ആയുര്വേദ ആശുപത്രികളില് ചികില്സ നടത്തുന്നത്. വിദഗ്ധരായ ഡോക്ടര്മാരുടെ സേവനം ഇവിടങ്ങളില് ലഭ്യമാണ്.
കംപ്യൂട്ടര്, മൊബൈല് ഫോണ് എന്നിവയുടെ വര്ധിച്ച ഉപയോഗം കാരണം 16 വയസ്സിന് താഴെയുള്ള കുട്ടികളിലുണ്ടാകുന്ന കാഴ്ച വൈകല്യങ്ങള്ക്കുള്ള ചികില്സ പുതുതായി ആരംഭിച്ച മിഴി പദ്ധതിയില് ലഭിക്കും. തുടക്കത്തില് തന്നെ കണ്ടെത്തിയാല് പൂര്ണമായി ചികില്സിച്ചുേഭദമാക്കാവുന്നതാണ് കാഴ്ച വൈകല്യങ്ങളില് പലതും. എന്നാല് അശ്രദ്ധകാരണം ഗുരുതരമായ പ്രശ്നങ്ങളാണ് കുട്ടികള് അനുഭവിക്കേണ്ടിവരുന്നത്. കാഴ്ച വൈകല്യം കണ്ടെത്തുന്നതിന് സ്കൂള് തലത്തില് ക്യാംപുകള് സംഘടിപ്പിക്കുമെന്നും മന്ത്രി പറഞ്ഞു.
ജില്ലാപഞ്ചായത്ത് പ്രസിഡണ്ട് കെ.വി.സുമേഷ് ചടങ്ങില് അധ്യക്ഷത വഹിച്ചു. ജില്ലാ പഞ്ചായത്തിന്റെ വാര്ഷിക പദ്ധതിയില് ഉള്പ്പെടുത്തി ഒന്നര കോടി രൂപയുടെ വികസന പദ്ധതികളാണ് ആയുര്വേദ ആശുപത്രിയില് നടന്നുവരുന്നതെന്ന് അദ്ദേഹം പറഞ്ഞു. ചുരുങ്ങിയ കാലം കൊണ്ട് ആശുപത്രിയുടെ മുഖച്ഛായ തന്നെ മാറ്റിയെടുക്കാന് സാധിച്ചു. ജില്ലാ ആയുര്വേദ ആശുപത്രിയെ സംസ്ഥാനത്തെ തന്നെ ഏറ്റവും മികച്ചതാക്കി മാറ്റുകയെന്ന ലക്ഷ്യത്തോടെയാണ് ജില്ലാ പഞ്ചായത്ത് പദ്ധതികള് നടപ്പാക്കുന്നതെന്നും അദ്ദേഹം പറഞ്ഞു.
ആശുപത്രി സൂപ്രണ്ട് ഡോ.കെ.എന്.സുബ്രഹ്മണ്യന് നമ്പൂതിരി റിപ്പോര്ട്ട് അവതരിപ്പിച്ചു. ജില്ലാ പഞ്ചായത്ത് വൈസ് പ്രസിഡണ്ട് പി.പി.ദിവ്യ, സ്റ്റാന്റിംഗ് കമ്മിറ്റി ചെയര്മാന് കെ.പി.ജയബാലന്, ജില്ലാ മെഡിക്കല് ഓഫീസര് ഡോ.എം.എസ്.പ്രസന്നകുമാരി, ആസൂത്രണ ബോര്ഡ് വര്ക്കിംഗ് ഗ്രൂപ്പ് മെമ്പര് കെ.വി.ഗോവിന്ദന് തുടങ്ങിയവര് സംസാരിച്ചു.
