തലശ്ശേരി: മാര്ക്സിസ്റ്റ് പാര്ട്ടിയുടെ നിര്ദ്ദേശ പ്രകാരം പ്രവര്ത്തിക്കുന്ന പോലീസ് ഓഫീസര്മാര്ക്ക് പാര്ട്ടിയാണ് വലുതെങ്കില് കാക്കി അഴിച്ചുവെച്ച് സിപിഎമ്മിന്റെ കോടിപിടിച്ച് നടക്കാന് തയ്യാറാവണമെന്ന് ബിജെപി സംസ്ഥാന സെക്രട്ടറി വി.കെ.സജീവന് ആവശ്യപ്പെട്ടു. സിപിഎം-ഡിവൈഎസ്പി അവിഹിത കൂട്ടുകെട്ടിനെതിരെ തലശ്ശേരി ഡിവൈഎസ്പി ഓഫീസിലേക്ക് സംഘപരിവാറിന്റെ നേതൃത്വത്തില് നടന്ന മാര്ച്ച് ഉദ്ഘാടനം ചെയ്തുകൊണ്ട് പ്രസംഗിക്കുകയായിരുന്നു അദ്ദേഹം.
നിരപരാധിയായ ആര്എസ്എസ് പ്രവര്ത്തകന് പള്ളൂര് ചേമ്പ്രയിലെ സുബീഷിനെ മൂന്നു ദിവസം മുമ്പ് കസ്റ്റഡിയിലെടുത്ത് ക്രൂരമായി പീഡിപ്പിച്ച തലശ്ശേരി ഡിവൈഎസ്പി പ്രിന്സ് എബ്രാഹിമിന്റെ നടപടിയില് പ്രതിഷേധിച്ചാണ് ഇന്നലെ രാവിലെ മാര്ച്ച് നടത്തിയത്. ശബരിമല ദര്ശനം കഴിഞ്ഞ് തിരിച്ചുവരുമ്പോള് മൂരാട് പാലത്തിനടത്തുവെച്ച് വാഹനം തടഞ്ഞാണ് സുധീഷിനെ കസ്റ്റഡിയിലെടുത്ത് അജ്ഞാത കേന്ദ്രത്തില് കൊണ്ടുപോയി തലകീഴായി കെട്ടിത്തൂക്കി മര്ദ്ദിച്ചത്. ആര്എസ്എസിനെതിരെ തങ്ങള് പറയുന്നത് പോലെ പറഞ്ഞാല് 25 ലക്ഷം രൂപ വാങ്ങിത്തരാം എന്നാണ് പോലീസ് വാഗ്ദാനം നല്കിയത്.
സുധീഷിനെ ദിവസങ്ങളോളം കസ്റ്റഡിയില്വെച്ച് അടിയന്തിരാവസ്ഥയെപ്പോലും നാണിപ്പിക്കും വിധമാണ് പീഡിപ്പിച്ചത്. സിപിഎമ്മിന്റെ നിര്ദ്ദേശ പ്രകാരമാണ് ഡിവൈഎസ്പിമാരായ പ്രിന്സ് അബ്രഹാമും പി.സദാനന്ദനും പ്രവര്ത്തിക്കുന്നത്. ഇത്തരക്കാരെ പോലീസുകാരായി കാണാന് പ്രയാസമാണെന്നും റിട്ടയര് ചെയ്താലും കോടതികയറിയിറങ്ങേണ്ട ഗതികേട് വരാതിരിക്കാന് ശ്രദ്ധിക്കുന്നതാണ് നല്ലതെന്നും സജീവന് മുന്നറിയിപ്പ് നല്കി.
മുമ്പ് ആര്എസ്എസിനെ നേരിടാന് സിപിഎം കുമാര സ്വാമിയെയും ശേഖര് മിനോയോടനെയും ഒക്കെ ഇറക്കി നോക്കിയിരുന്നു. എന്നാല് അവരൊക്കെ ആര്എസ്എസിന് മുന്നില് മുട്ടുമടക്കി തിരിച്ചുപോവുകയാണുണ്ടായത്. സാധാരണയായി വ്യക്തിപരമായി ബിജെപി ആരെയും അധിക്ഷേപിക്കാറില്ല. എന്നാല് കണ്ണൂരിലെ രണ്ട് ഡിവൈഎസ്പിമാരും സിപിഎമ്മിനുവേണ്ടി ആര്എസ്എസ് വിരുദ്ധ നിലപാട് സ്വീകരിക്കുകയാണെങ്കില് ഞങ്ങളുടെ ശൈലിയും മാറ്റേണ്ടിവരുമെന്നും അദ്ദേഹം കൂട്ടിച്ചേര്ത്തു.
ആര്എസ്എസ് ജില്ലാ കാര്യകാരി സദസ്യന് കെ.ബി.പ്രജില് അധ്യക്ഷത വഹിച്ചു. ബിജെപി ജില്ലാ സെക്രട്ടറി എന്. ഹരിദാസന് പ്രസംഗിച്ചു. എം.പി.സുമേഷ് സ്വാഗതം പറഞ്ഞു. എ.പി.പത്മിനി ടീച്ചര്, കൂട്ട ജയപ്രകാശ്, കെ.സീവന്, കെ.പ്രമോദ്, പി.വി.ശ്യാംമോഹന്, ആര്.കെ.ഗിരിധരന്, ലസിതാ പാലക്കല്, സ്മിതാ ജയമോഹന് കെ.എന്.മോഹനന് തുടങ്ങിയവര് മാര്ച്ചിന് നേതൃത്വം നല്കി.
