ഫോട്ടോഗ്രാഫര് ആന്ഡ്രൂ ലീ പ്രകൃതി ഭംഗികള് തന്റെ ക്യാമറയില് പകര്ത്തുന്നതിനായാണ് ഇറങ്ങി തിരിച്ചത്. അപ്പോഴും ഇത്ര സുന്ദരമായ ദൃശ്യങ്ങള് തനിക്ക് ലഭിക്കുമെന്ന് അദ്ദേഹം സ്വപ്നത്തില് പോലും ചിന്തിച്ചു കാണില്ല. കാലിഫോര്ണിയയിലെ ഫുള്ളര്ടണിലെ വലിയ കുളത്തില് തനിക്കായി മാത്രം പ്രകൃതിയൊരുക്കിയ ആ ദൃശ്യങ്ങളെല്ലാം ലീ പകര്ത്തുകയും ചെയ്തു. അമ്പത്തഞ്ചുകാരനായ ഈ കാലിഫോര്ണിയക്കാരന് അതിന്റെ സന്തോഷത്തിലുമാണ്.
കുളത്തിലൂടെ നീന്തിത്തുടിച്ച് മുന്നേറുന്ന താറാവ് ഇരയെ കീഴ്പ്പെടുത്തി ആഹാരമാക്കുന്ന ദൃശ്യങ്ങളാണ് ലീ പകര്ത്തിയത്. കറുത്ത നിറത്തിലുള്ള തലയും മഞ്ഞ നിറത്തോടെയുള്ള കണ്ണുകളോടും കൂടിയ താറാവ്, ആ വലിയ കുളത്തിന്റെ അരികിലൂടെ ഇര തേടി നീന്തുകയാണ്. കൊഞ്ചിനെ മാത്രം ലക്ഷ്യമാക്കിയാണ് ഇര തേടുന്നത്.
മുങ്ങി തപ്പി താറാവ് പലപ്പോഴും ഇരയൊന്നും ലഭിക്കാതെയാണ് വെള്ളത്തിന് മുകളിലെത്തുന്നത്. എന്നാല് അവസാനം ആ ലക്ഷ്യം താറാവ് നേടുക തന്നെ ചെയ്തു. ഒരു വലിയ ചുവന്ന കൊഞ്ചിനെ തന്റെ കൊക്കിനുള്ളില് ഒതുക്കി വെള്ളത്തിന് മുകളിലെത്തിയ താറാവിന്റെ ദൃശ്യങ്ങള് അതി മനോഹരമായാണ് ലീ പകര്ത്തിയിരിക്കുന്നത്.
തന്നെ ഇരയാക്കിയ താറാവിന്റെ കൈകളില് നിന്ന് പലവിധേന കൊഞ്ച് രക്ഷപ്പെടാന് ശ്രമിക്കുന്നുണ്ട്. എന്നാല് താറാവുണ്ടോ വിടുന്നു. കൊഞ്ചിനെ തലങ്ങും വിലങ്ങും കുടഞ്ഞ് തന്റെ ആഹാരമാക്കുനുള്ള ശ്രമം താറാവും തുടര്ന്നു. ഒടുവില് കൊഞ്ചിന്റെ രണ്ട് വലിയ കൈകളും ഇല്ലാതായി. പിന്നത്തെ കാര്യം പറയാനുണ്ടോ… കൊഞ്ച് താറാവിന്റെ വയറ്റിലുമായി.
ആഹാരകൊണ്ട് വയറു നിറഞ്ഞ താറാവിനും മികച്ച പ്രകൃതി ഭംഗി പകര്ത്താനായ ലീക്കും ഒടുവില് സംതൃപ്തിയും സന്തോഷവും.
