മാവേലിക്കര: കേരളത്തില് ആവര്ത്തിക്കുന്ന കളക്ട്രേറ്റ് സ്ഫോടനങ്ങള്ക്ക് ആഭ്യന്തരവകുപ്പിന്റെ ഭാഗത്തു നിന്നും അടിയന്തര ജാഗ്രത ഉണ്ടാകണമെന്നും നടന്ന സംഭവങ്ങളില് സ്വീകരിച്ച നടപടികള് പൊതുസമൂഹത്തെ ബോധ്യപ്പെടുത്തണമെന്നും ഭാരതീയവിചാരകേന്ദ്രം മാവേലിക്കര സ്ഥാനീയസമിതി ആവശ്യപ്പെട്ടു.
ഭരണകൂടത്തിന്റെ ജില്ലാകേന്ദ്രങ്ങളായ കളകട്രേറ്റുകള്, പൊതുജനങ്ങള് ജീവനാവശ്യങ്ങള്ക്കായി നിത്യം എത്തുന്ന സ്ഥലമാണ്. സ്ഫോടന പരമ്പരയിലൂടെ ജനങ്ങളില് അസ്വസ്ഥത സൃഷ്ടിച്ച് അവരില് സുരക്ഷിതത്വബോധം ഇല്ലാതാക്കുകയാണ് സ്ഫോടനക്കാരുടെ ലക്ഷ്യം.
ഒരു രാജ്യത്തെ ബാഹ്യ ഇടപെടലിലൂടെ പരാജയപ്പെടുത്താന് ശത്രുരാജ്യത്തിന് സാധിക്കാതെ വരുമ്പോള് ജനതയുടെ ആത്മവിശ്വാസം തകര്ത്ത് രാഷ്ട്രത്തെ ദുര്ബലപ്പെടുത്തുന്ന മന:ശാസ്ത്രപരമായ ഒരു ആക്രമണരീതിയാണിത്.
നടന്ന സ്ഫോടനങ്ങള് ഒന്നുംതന്നെ യാദൃശ്ചികമായി സംഭവിച്ചതല്ല, മറിച്ച് ഇതിന്റെ പിന്നില് കൃത്യമായ ആലോചനയും ആസൂത്രണവുമുണ്ട്. ഭരണകൂടവും, പൊതുസമൂഹവും ഈ ആപല്ധര്മ്മം തിരിച്ചറിഞ്ഞ് രാഷ്ട്രീയ, ജാതി, മത വ്യത്യാസമില്ലാതെ ഭാരതപൗരനെന്ന നിലയ്ക്ക് ജാഗരൂകനായി നിലയുറപ്പിക്കാന് കഴിയണമെന്നും യോഗം അഭിപ്രായപ്പെട്ടു.
ഭാരതീയവിചാരകേന്ദ്രം മാവേലിക്കര സ്ഥാനീയസമിതി പ്രസിഡന്റ് ആര്.കെ. പിള്ള അദ്ധ്യക്ഷത വഹിച്ചു. ആലപ്പുഴ ജില്ലാ ജോ.സെക്രട്ടറി പി.എസ്. സുരേഷ് ഉദ്ഘാടനം ചെയ്തു. പ്രൊഫ. വി. ശിവശങ്കര പിള്ള, ബി. രവീന്ദ്രന് പിള്ള, ജി. രാജേന്ദ്ര പ്രസാദ്, മോഹന് മാവേലിക്കര, എസ്. വിജയമോഹന്, പ്രൊഫ. സുകുമാരന് നായര്, ബി. രഞ്ജിത്ത് കുമാര് എന്നിവര് സംസാരിച്ചു. പാകിസ്ഥാന് ആക്രമണത്തില് വീരമൃത്യു വരിച്ച സൈനികര്ക്ക് ചടങ്ങില് ആദരാഞ്ജലികള് അര്പ്പിച്ചു.
