പനമരം : മാതൃഭാഷയെ അവഗണിക്കുന്നതിനെതിരെ പൊതുസമൂഹം ഉണരണമെന്ന് ജില്ലാ പഞ്ചായത്ത് പ്രസിഡണ്ട് ടി. ഉഷാകുമാരി. വയനാട് സര്വ്വശിക്ഷാ അഭിയാന് സ ംഘടിപ്പിച്ച കേരളപ്പിറവി ദിനാഘോഷം പനമരം പഞ്ചായത്ത് കോണ്ഫറന്സ്ഹാളില് ഉദ്ഘാടനം ചെയ്ത് സംസാരിക്കുകയായിരുന്നു അവര്. നമ്മുടെ നാടിന്റെ സംസ്ക്കാരവും സ്പന്ദനവും മലയാളത്തിലൂടെ മാത്രമെ സ്വാംശീകരിക്കാനാവൂ. നാടിനെ അറിയാനും നാടിനെ നയിക്കാനും മലയാള ഭാഷകൂടിയേതീരു. പ്രാഥമിക വിദ്യാഭ്യാസം മാതൃഭാഷയിലൂടെ മാത്രമെ പാടുള്ളൂ എന്ന നിയമം നിലനില്ക്കെ കേരള സമൂഹം മലയാളത്തോട് കാണിക്കുന്ന അകല്ച്ച നമ്മുടെ കുട്ടികളില് സാംസ്കാരിക ച്യുതിക്ക് കാരണമാകുന്നു. ഇംഗ്ലീഷ് ഭാഷ അനായാസം കൈകാര്യം ചെയ്യണമെന്ന കാര്യത്തില് തര്ക്കമില്ല. എന്നാല് അതിനോട് കാണിക്കുന്ന അന്ധമായ മമത നമ്മുടെ ഭാഷയെ വേരോടെ പിഴുതെടുക്കും. ഈ ഒരവസ്ഥയില് നിന്ന് മാതൃഭാഷയെ സംരക്ഷിക്കാന് എല്ലാവരും മുന്നിട്ടിറങ്ങണം.
ജില്ലാ പഞ്ചായത്ത് വൈസ്പ്രസിഡണ്ട് പി.കെ.അസ്മത്ത് അധ്യക്ഷനായിരുന്നു. പനമരം പഞ്ചായത്ത് പ്രസിഡണ്ട് ലിസി തോമസ് സംസ്ഥാന ശാസ്ത്രനാടക മത്സരത്തില് രണ്ടാംസ്ഥാനം നേടിയ പനമരം ജിഎച്ച്എസ്എസ്ലെ കുട്ടികള്ക്ക് അവാര്ഡ് വിതരണം ചെയ്തു. ജില്ലാ പഞ്ചായത്ത് സ്റ്റാന്റിംഗ് കമ്മിറ്റി ചെയര്പേഴസണ് എ.ദേവകി, എസ്.എസ്.എ ജില്ലാ പ്രോജക്ട് ഓഫീസര് ജി.എന്.ബാബുരാജ്, പനമരംപഞ്ചായത്ത്വിദ്യാഭ്യാസ സ്റ്റാ ന്റിംഗ്കമ്മിറ്റിചെയര്പേഴ്സ ണ് ജുല്ന ഉസ്മാന്, പനമരം ബ്ലോക്ക് മെമ്പര് സതിദേവി. പി, മോളി.കെ.ജെ, വി.ജെ.തോമസ്, കെ.കെ.വര്ഗ്ഗീസ്, സത്യന്.കെ, സജി.എം.ഒ എന്നിവര് സംസാരിച്ചു.
മാതൃഭാഷയും പൊതുവിദ്യാഭ്യാസവും എന്ന വിഷയത്തില് നടന്ന സെമിനാറില് പ്രൊഫ. പി.സി.രാമന്കുട്ടി വിഷയാവതരണം നടത്തി. ആര് എംഎസ്എ അസിസ്റ്റന്റ് പ്രോജക്ട് ഓഫീസര് ശിവപ്രസാദ്.പി മോഡറേറ്ററായിരുന്നു. പനമരം ടിടിഐ, കണിയാമ്പറ്റ ബിഎഡ് സെന്റര്, ജി.വി.എച്ച്.എസ്. പനമരം എന്നീ സ്ഥാപനങ്ങളിലെ വിദ്യാര്ത്ഥികള്, എസ്.എസ്.എ പ്രവര്ത്തകര്, പൊതുപ്രവര്ത്തകര്, റിട്ടയേര്ഡ് അധ്യാപകര് എന്നിവര് ചര്ച്ചയില് പങ്കെടുത്തു.
