തിരുവനന്തപുരം മുന്നേറ്റം തുടരുന്നു

തൃശൂര്‍: 47-ാം സംസ്ഥാന സ്‌കൂള്‍ നീന്തല്‍ ചാമ്പ്യന്‍ഷിപ്പില്‍ മൂന്നാം ദിവസവും തലസ്ഥാന ജില്ല മുന്നേറ്റം തുടരുന്നു. 85 ഇനങ്ങള്‍ പൂര്‍ത്തിയായപ്പോള്‍ 576 പോയിന്റുമായി തിരുവനന്തപുരം മുന്നില്‍. 60 സ്വര്‍ണവും 58 വെള്ളിയും 50 വെങ്കലും തിരുവനന്തപുരം വാരിക്കൂട്ടി. 113 പോയിന്റുമായി എറണാകുളവും, 108 പോയിന്റുമായി ആതിഥേയരായ തൃശൂരുമാണ് രണ്ടും മൂന്നും സ്ഥാനങ്ങളില്‍. എറണാകുളം ഒമ്പത് സ്വര്‍ണവും 11 വെള്ളിയും ഏഴ് വെങ്കലവും, തൃശൂര്‍ എട്ട് സ്വര്‍ണവും പത്ത് വെള്ളിയും 20 വെങ്കലവും നേടി. കോട്ടയം ജില്ലയാണ് നാലാമത്.

എല്ലാ ജില്ലകളില്‍ നിന്നു മത്സരാര്‍ഥികളുണ്ടെങ്കിലും ഇതുവരെ എട്ട് ജില്ലകള്‍ മാത്രമാണ് മെഡല്‍ പട്ടികയില്‍ ഇടം നേടിയത്. ഒരോ പോയിന്റുമായി കണ്ണൂര്‍, പാലക്കാട് ജില്ലകളും നാല് പോയിന്റുമായി കാസര്‍ഗോഡും 13 പോയിന്റുമായി കോഴിക്കോടുമാണ് മെഡല്‍പട്ടികയിലുള്ളത്.

തിരുവനന്തപുരം പിരപ്പന്‍കോട് ഗവ. വിഎച്ച്എസ്എസാണ് 72 പോയിന്റുമായി സ്‌കൂള്‍തലത്തില്‍ ഒന്നാമത്. തൊട്ടുപിറകെ 71 പോയിന്റുമായി തുണ്ടതില്‍ എംവിഎച്ച്എസ്എസ്. 59 പോയിന്റുമായി കന്യാകുളങ്ങര ഗവ. ഗേള്‍സ് എച്ച്എസ്എസ് മൂന്നാമത്. മേളയില്‍ ഇതുവരെ ആറ് മീറ്റ് റെക്കോഡുകള്‍ പിറന്നു. മൂന്നാംദിനമായ ഇന്നലെ കോഴിക്കോട് ജില്ലയിലെ വടകര ശ്രീനാരായണ എച്ച്എസ്എസിലെ ജോര്‍ജ് എസ്. കദളിക്കാട്ടിലാണ് 50, 100മീറ്റര്‍ ബ്രസ്റ്റ് സ്‌ട്രോക്ക് മത്സരങ്ങളില്‍ മീറ്റ് റെക്കോഡ് നേടിയത്.

500ഓളം താരങ്ങളാണ് മത്സരങ്ങളില്‍ പങ്കെടുക്കുന്നത്. നീന്തല്‍ മത്സരങ്ങള്‍ക്കു പുറമെ വാട്ടര്‍പോളോ മത്സരങ്ങളും നടക്കുന്നു. ചാമ്പ്യന്‍ഷിപ്പ് ഇന്ന് സമാപിക്കും. സബ് ജൂനിയര്‍, ജൂനിയര്‍, സീനിയര്‍ എന്നിങ്ങനെ 104 ഇനങ്ങളില്‍ മത്സരം. മറ്റ് ഗെയിംസുകളില്‍ നിന്നു വ്യത്യസ്തമായി ആദ്യമായി ദേശീയ ഗെയിംസുകള്‍ക്ക് ഉപയോഗിച്ച് വരുന്ന ഇലക്ട്രോണിക് ടച്ച് പാഡുകള്‍ ഇത്തവണ ഉപയോഗിക്കുന്നുണ്ട്.

വാട്ടര്‍പോളോ മത്സരം ആണ്‍കുട്ടികള്‍ക്ക് മാത്രം. യോഗ്യത നേടുന്നവര്‍ക്ക് ഗുജറാത്തില്‍ സംഘടിപ്പിക്കുന്ന ദേശീയ സ്‌കൂള്‍ അക്വാട്ടിക് ചാംപ്യന്‍ഷിപ്പില്‍ മത്സരിക്കാം. വാട്ടര്‍ പോളോ ഫൈനല്‍ ഇന്ന്. തൃശൂരും പോയിന്റ് പട്ടികയില്‍ ഒന്നാമതുള്ള തിരുവനന്തപുരവും ഏറ്റുമുട്ടും.