ജനവാസ കേന്ദ്രത്തിന് സമീപം കാട്ടാന പ്രസവിച്ചു

കരുവാരകുണ്ട്: പറയന്‍മാട് ആദിവാസി കോളനിക്കു സമീപത്തെ കൃഷിയിടത്തില്‍ കാട്ടാന പ്രസവിച്ചു പ്രദേശവാസികള്‍ ഭീതിയില്‍.ഞായറാഴ്ച രാത്രിയിലാണ് കാട്ടാനപ്രസവിച്ചെതെന്നാണ് സൂചന. ഇന്നലെ രാവിലെ ടാപ്പിങ്ങിനെത്തിയ തൊഴിലാളികളാണ് വിവരം പരിസരവാസികളെ അറിയിച്ചത്. തൊഴിലാളികളെ ആനവിരട്ടിയോടിക്കവാനുള്ള ശ്രമം നടത്തി. കാട്ടാന ഭീതിയില്‍ കൃഷിയിടത്തില്‍ പോകുവാനും ജനങ്ങള്‍ ഭയക്കുന്നു.ഇതിനു തൊട്ടടുത്ത് ആദിവാസി കുടുബങ്ങളും പാര്‍ക്കുന്നുണ്ട്. തള്ളയാനെയും കുട്ടിയെയും സംരക്ഷിക്കുവാന്‍ കൊമ്പനടക്കമുള്ള ആനകള്‍ പരിസരത്ത് നിലയുറപ്പിച്ചിട്ടുണ്ട്. വനം വകുപ്പധികൃതര്‍ സ്ഥലത്തെത്തി കൃഷിയിടത്തില്‍ നിന്നും കാട്ടാനകളെ തുരത്താന്‍ ശ്രമിച്ചെങ്കിലും ഫലം കണ്ടില്ല. കുട്ടിയാനക്ക് നടന്നു പോകുന്നതിനുള്ള പ്രയാസം കൊണ്ടാകാം ഇവ വനത്തിലേക്ക് തിരിച്ചു പോകാന്‍ തയ്യാറാകാത്തതെന്നാണ് വനം വകുപ്പധികൃതര്‍ നല്‍കുന്ന സൂചന.