കണ്ണൂര്: സമാധാന ആഹ്വാനവുമായി കണ്ണൂര് പൗരസമിതിയുടെ നേതൃത്വത്തില് സ്നേഹസംഗമം ഒരുക്കുന്നു. വിവിധ സാമൂഹിക, സാംസ്കാരിക സംഘടനകള് ജനകീയ കൂട്ടായ്മകള് എന്നിവയുടെ സഹകരണത്തോടെ കനിവിന്റെ കണ്ണൂര്, ഇനിയില്ല കണ്ണൂര് എന്ന ആശയവുമായാണ് 25 ന് വിപുലമായ പരിപാടികള് സംഘടിപ്പിക്കുന്നതെന്ന് സംഘാടകര് വാര്ത്താസമ്മേളനത്തില് അറിയിച്ചു. അക്രമങ്ങളിലൂടെയുള്ള രക്തച്ചൊരിച്ചിലല്ല മാനവസമൂഹത്തിനുവേണ്ടത് സമാധാനത്തിനുവേണ്ടിയുള്ള രക്തദാനമാണ് മഹത്തരം എന്ന സന്ദേശവുമായി 1001 പേര് രക്തദാനം നടത്തും. 101 പേര് പങ്കെടുക്കുന്ന ഉപവാസം, വിദ്യാര്ഥികളും പൊതുജനങ്ങളും ഉള്പ്പെടെ പതിനായിരങ്ങള് അണിനിരന്ന് ഉച്ചക്ക് രണ്ടിന് ടൗണ്സ്ക്വയറില് നിന്നാരംഭിച്ച് സ്റ്റേഡിയം ചുറ്റി മൂന്ന് മണിക്ക് ടൗണ്സ്ക്വയറില് സമാപിക്കുന്ന സമാധാന റാലി, പൊതുസമ്മേളനം തുടങ്ങിയ പരിപാടികള് സ്നേഹസംഗമത്തിന്റെ ഭാഗമായി നടക്കും.
വ്യാപാരി വ്യവസായി ഏകോപനസമിതി, ചേംബര് ഓഫ് കൊമേഴ്സ്, ദിശ, തലശ്ശേരി രൂപത, കണ്ണൂര് രൂപത, കോട്ടയം രൂപത (മലബാര് റീജിയന്), കേരള മദ്യ നിരോധന സമിതി, ഗാന്ധി പീസ് മിഷന്, ഹ്യൂമനിസ്റ്റ് മൂവ്മെന്റ്, കണ്ണൂര് പീസ് ഫോറം, ബ്ലഡ് ഡോണേഴ്സ് കേരള, ഗാന്ധി സ്മാരകനിധി, വൈസ്മെന് ഇന്റര്നാഷനല്, നിര്മല് ചാരിറ്റബിള് ട്രസ്റ്റ്, കണ്ണൂര് സാംസ്ക്കാരിക വേദി, വൈഎംസിഎ, മാതാഅമൃതാനന്ദമയി മഠം, ആന്റി കറപ്ഷന് പീപ്പിള്സ് മൂവ്മെന്റ് കേരള, ഗാന്ധി യുവജനവേദി തുടങ്ങി ഒട്ടേറെ സംഘടനകളും സ്ഥാപനങ്ങളും പരിപാടിക്ക് പിന്തുണ അറിയിച്ചിട്ടുണ്ടെന്ന് രക്ഷാധികാരി ബിഷപ്പ് അലക്സ് വടക്കുംതല, ചെയര്മാന് ഫാ ഡേവിസ് ചിറമ്മല്, രാജന് തീയറേത്ത്, സ്വാമി അമൃതകൃപാനന്ദപുരി എന്നിവര് വാര്ത്താസമ്മേളനത്തില് അറിയിച്ചു.
