കോഴിക്കോട്: കാരപ്പറമ്പ് വാര്ഡ് കൗണ്സിലര് നവ്യാ ഹരിദാസിന്റെ ഓഫീസ് തീവെച്ചു നശിപ്പിച്ച കേസിലെ പ്രതികളെ അറസ്റ്റുചെയ്യാത്തതില് പ്രതിഷേധിച്ച് മഹിളാ മോര്ച്ച നടത്തിയ നടക്കാവ് സിഐ ഓഫീസ് മാര്ച്ചില് പ്രതിഷേധം ഇരമ്പി.
പ്രതികളെ ഇനിയും പിടികൂടാത്ത പോലീസ് നടപടി അംഗീകരിക്കാനാവില്ലെന്ന് മാര്ച്ച് ഉദ്ഘാടനം ചെയ്ത ബിജെപി സംസ്ഥാനസമിതി അംഗം പി. രമണീഭായ് പറഞ്ഞു. സമീപത്തെ സിസിടിവി ക്യാമറ ദൃശ്യങ്ങളടക്കം നല്കിയിട്ടും തെളിവുകള് കിട്ടിയിട്ടില്ലെന്നാണ് പോലീസ് നിലപാട്. പോലീസിനെ ചിലര് സ്വതന്ത്രമായി പ്രവര്ത്തിക്കാന് അനുവദിക്കാത്തതാണ് പ്രതികളെ പിടികൂടുന്നതിന് തടസ്സമാകുന്നത്. കാരപ്പറമ്പില് ബിജെപി ഓഫീസ് കത്തിച്ച കേസിലെ പ്രതികളെ ഇനിയും പിടികൂടിയിട്ടില്ല. കൗണ്സിലറുടെ ഓഫീസ് കത്തിച്ചവരെയും കണ്ടെ ത്തിയിട്ടില്ല. പ്രതികളെ പിടികൂടാത്തതാണ് വീണ്ടും അക്രമ ങ്ങള് ഉണ്ടാകുന്നതിന് കാരണമാവുന്നത്. കഴിഞ്ഞദിവസം വാര്ഡ് വികസനസമിതി കണ്വീനര് ഷൈജുവിന് നേരെയുണ്ടായ അക്രമവും പ്രതിഷേധാര്ഹമാണെന്നും അവര് കൂട്ടിച്ചേര്ത്തു.
കൗണ്സിലര് നവ്യ ഹരിദാസ് അദ്ധ്യക്ഷത വഹിച്ചു. മഹിളാ മോര്ച്ച സംസ്ഥാന ജനറല് സെക്രട്ടറി ജയാ സദാനന്ദന്, മണ്ഡലം പ്രസിഡന്റ് ശോഭാ സുരേന്ദ്രന്, സെക്രട്ടറി സി.എസ്. സത്യഭാമ തുടങ്ങിയവര് സംസാരിച്ചു. കൗണ്സിലര്മാരായ ജിഷ ഗിരീഷ്, ഷൈമ പൊന്നത്ത്, ബിജെപി ജില്ലാ വൈസ് പ്രസിഡന്റ് ഇ. അനിത, ദീപ ടി മണി, രാധ തുടങ്ങിയവര് നേതൃത്വം നല്കി. വണ്ടിപ്പേട്ടയില് നിന്ന് ആരംഭിച്ച മാര്ച്ച് സിഐ ഓഫീസിന് സമീപം പോലീസ് തടഞ്ഞു.
ജൂലൈ 31 നാണ് സേവാകേന്ദ്രമെന്ന പേരില് കാരപ്പറമ്പ് നെല്ലിക്കാവ് ക്ഷേത്രത്തിനു സമീപം കൗണ്സിലര് നവ്യ ഹരിദാസിന്റെ ഓഫീസ് പ്രവര്ത്തനമാരംഭിച്ചത്. ജനങ്ങളുടെ പരാതികളും അപേക്ഷകളും സ്വീകരിക്കാനും കൗണ്സിലറെ കാണുന്നതിനുള്ള സൗകര്യമൊരുക്കുന്നതിനുമായാണ് ഓഫീസ് തുറന്നത്. എന്നാല് ആഗസ്ത് എട്ടിന് പുലര്ച്ചെ ഓഫീസിന് തീവെച്ചു.
ഓഫീസിന്റെ ഷട്ടറിന്റെ പൂട്ട് തകര്ത്ത് അകത്തുകയറിയ അക്രമികള് എല്ഇഡി ടിവി, വിവിധ ആവശ്യങ്ങള്ക്കായി നല്കിയ അപേക്ഷാഫോമുകള്, രജിസ്റ്റര് എന്നിവ തീവെച്ചു നശിപ്പിക്കുകയായിരുന്നു. ഓഫീസിനു മുകളില് സ്ഥാപിച്ചിരുന്ന ബോര്ഡും അക്രമികള് എടുത്തു മാറ്റി.
അക്രമികള് തീവെച്ചു നശിപ്പിച്ചെങ്കിലും ആഗസ്ത് 15ന് തന്നെ ഓഫീസ് വീണ്ടും തുറന്നു.
