കല്ലടിക്കോട്: കുടുംബശ്രീ പ്രവര്‍ത്തകര്‍ക്കുള്ള ശില്പശാലയില്‍ പങ്കെടുക്കാനെത്തിയ മാധ്യമ പ്രവര്‍ത്തകയെ പീഡിപ്പിക്കാന്‍ ശ്രമിച്ച സംഭവത്തിലെ പ്രതിയെ കോങ്ങാട് പോലീസ് അറസ്റ്റുചെയ്തു. പൊരിയാനി പുത്തന്‍പീടികയില്‍ അസീസിന്റെ മകന്‍ ഷാജഹാന്‍(27) ആണ് അറസ്റ്റിലായത്. മുണ്ടൂര്‍ ഐആര്‍ടി സിയില്‍ കഴിഞ്ഞ ബുധനാഴ്ച രാവിലെയായിരുന്നു സംഭവം. എറണാകുളത്ത് ജോലി ചെയ്യുന്ന മാധ്യമ പ്രവര്‍ത്തകകുടുംബശ്രീ പ്രവര്‍ത്തകര്‍ക്കുള്ള ശില്പശാലയില്‍ പങ്കെടുക്കുന്നതിനായി എത്തിയപ്പോഴായിരുന്നു സംഭവം.
കോങ്ങാട് പോലീസ് പറയുന്നത് ഇങ്ങനെ: പൊരിയാനി ബസ് സ്റ്റോപ്പിലിറങ്ങി ഒരു കിലോമീറ്റര്‍ ദൂരമുള്ള ഐആര്‍ടിസിയില്‍ നടക്കുന്ന ക്യാമ്പില്‍ സംസാരിക്കാന്‍ മാധ്യമ പ്രവര്‍ത്തക നടന്നു വരുമ്പോള്‍ ബുള്ളറ്റ് ബൈക്കിലെത്തിയ പ്രതി ചിരപരിചിതനെപ്പോലെ പരിചയപ്പെട്ടു. തുടര്‍ന്ന് ബൈക്ക് നിര്‍ത്തി ഒപ്പം നടക്കുന്നതിനിടെ വിജയമായ റോഡില്‍ നിന്നും താഴേക്ക് പിടിച്ചുവലിച്ച് പീഡിപ്പിക്കാന്‍ ശ്രമിച്ചു. യുവതി ശബ്ദം ഉണ്ടാക്കിയതിനെ തുടര്‍ന്ന് ബൈക്കുമായി ഇയാള്‍ സ്ഥലവിടുകയും ചെയ്തു. ഡല്‍ഹി രജിസ്‌ട്രേഷനുള്ള വാഹനത്തിന്റെ ഉടമയെ വാട്‌സ് ആപ്പിന്റെ സഹായത്തോടെയാണ് കണ്ടെത്തിയത്.
തലേദിവസം ഐആര്‍ടിസിയിലെ ജീവനക്കാരിക്കു നേരെ അസഭ്യവര്‍ഷവും ആക്രമണവും നടത്താനും ഷാജഹാന്‍ ശ്രമിച്ചു. ഈ സമയത്ത് മറ്റൊരു വാഹനം വന്നതിനെ തുടര്‍ന്ന് പ്രതി ബുള്ളറ്റില്‍ രക്ഷപ്പെട്ടതായ പരാതിയും കോങ്ങാട് പോലീസില്‍ ലഭിച്ചിട്ടുണ്ട്. മാധ്യമപ്രവര്‍ത്തകയെ പീഡിപ്പിക്കാന്‍ ശ്രമിച്ച സംഭവത്തില്‍ കോടതിയില്‍ ഹാജരാക്കിയ പ്രതിയെ 14 ദിവസത്തേക്ക് റിമാന്റ് ചെയ്തു.
പ്രതികരിക്കാൻ ഇവിടെ എഴുതുക: