സമീറുദ്ദീന് ഷാ, ആര്.എല്. ഹാംഗ്ലൂ
ന്യൂദല്ഹി: അലഹബാദ്, അലിഗഢ് കേന്ദ്ര സര്വ്വകലാശാലകളിലെ വൈസ് ചാന്സലര്മാര്ക്കെതിരെ അന്വേഷണത്തിന് കേന്ദ്ര മാനവവിഭവശേഷി മന്ത്രി പ്രകാശ് ജാവ്ദേക്കര് രാഷ്ട്രപതിയുടെ അനുമതി തേടി.
സാമ്പത്തിക, ഭരണസംവിധാനങ്ങളിലും, സര്വ്വകലാശാലാ നടത്തിപ്പിലുമുള്ള ക്രമക്കേടുകള് പരിഗണിച്ച് അലിഗഢ് മുസ്ലിം സര്വ്വകലാശാലാ വിസി സമീറുദ്ദീന് ഷാ, അലഹബാദ് സര്വ്വകലാശാല വിസി ആര്.എല്. ഹാംഗ്ലൂ എന്നിവര്ക്കെതിരെയാണ് അന്വേഷണം.
പ്രൊഫസര്, അസോസിയേറ്റ് പ്രൊഫസര് തസ്തികകള് ഒഴിഞ്ഞിരിക്കെ അസിസ്റ്റന്റ് പ്രൊഫസറെ നിയമിച്ചതും വിദ്യാര്ത്ഥികളില് നിന്ന് പണം പിരിച്ച് സ്വകാര്യ ട്രസ്റ്റായ സര് സയ്യിദ് ഫൗണ്ടേഷന്റെ അക്കൗണ്ടിലേക്ക് മാറ്റിയതുമാണ് സമീറുദ്ദീന് ഷായ്ക്കെതിരെയുള്ള പ്രധാന പരാതികള്.
കാമ്പസിലെ അശാന്തിയാണ് മറ്റൊന്ന്. പ്രൊഫസറായി ഒരിക്കല് പോലും ജോലിയിലിരുന്നിട്ടില്ലാത്ത ഒരു റിട്ടയേര്ഡ് ബ്രിഗേഡിയറെ സര്വ്വകലാശാലാ പ്രൊ. വൈസ് ചാന്സലറായി ഷാ നിയമിച്ചത് വിവാദമായിരുന്നു.
കായിക പരിശീലകന്റെ നിലവിലില്ലാത്ത തസ്തികയിലേക്കുള്ള നിയമനം, വിസിക്കുള്ള സുഖസൗകര്യങ്ങള് വര്ദ്ധിപ്പിക്കാന് 70 ലക്ഷം രൂപയും സ്വന്തമായി സുരക്ഷാ ജീവനക്കാരനെ നിയമിക്കാന് 10 ലക്ഷം രൂപയും അന്യായമായി ചെലവഴിച്ചത്, ബിരുദാനന്തര ബിരുദ കോഴ്സുകളിലേക്കും ഗവേഷക കോഴ്സുകളിലേക്കുമുള്ള പ്രവേശന പരീക്ഷകളിലെ ക്രമക്കേടുകള് എന്നിവയാണ് ഹാംഗ്ലൂവിനെതിരെയുള്ള ആരോപണങ്ങള്.
