കൊട്ടാരക്കര: ജോലി വാഗ്ദാനം നല്കി സൈനികന് ലക്ഷങ്ങള് തട്ടിയെടുത്തതായി പരാതി. കേന്ദ്രസര്ക്കാര് സ്ഥാപനങ്ങളില് ജോലി വാഗ്ദാനം നല്കി കരസേനയിലെ സൈനികനായ യുവാവ് ലക്ഷങ്ങള് തട്ടിയെടുത്തതായാണ് പരാതി. പോലീസിനും ഉന്നത ഭരണാധികാരികള്ക്കും പരാതി നല്കിയിട്ടും പരിഹാരം ഉണ്ടായിട്ടില്ല.
വെണ്ടാര് അമ്പനാട്ട് പടിഞ്ഞാറ്റതില് ശ്രീജിത്തിന് എതിരെയാണ് പലരില് നിന്നും അര കോടിയോളം രൂപ തട്ടിയെടുത്തതായി പരാതി ഉയര്ന്നിരിക്കുന്നത്. റെയില്വേ, സൈന്യം, ബാങ്ക് എന്നിവിടങ്ങളില് ജോലി തരപ്പെടുത്തി തരാമെന്ന് വാഗ്ദാനം നല്കിയാണ് തട്ടിപ്പ്. രണ്ട് വര്ഷം മുന്പ് നടന്ന തട്ടിപ്പില് അയല്വാസികളും മറുനാട്ടിലുള്ളവരും അകപെട്ടിട്ടുണ്ട്. അഞ്ചുലക്ഷം മുതല് 20 ലക്ഷം രൂപ വരെ നഷ്ടപ്പെട്ടതായി പരാതിക്കാരായ വെണ്ടാര് മുഞ്ഞക്കല് വീട്ടില് മോഹന്ദാസ്, വെണ്ടാര് പൊയ്കയില് വീട്ടില് മണിയന്പിള്ള എന്നിവര് പറയുന്നു. മാവേലിക്കര സ്വദേശിനിയായ വീട്ടമ്മക്ക് 15 ലക്ഷവും എടത്വാ സ്വദേശിക്ക് 10 ലക്ഷവും നഷ്ടമായതായി പരാതിയുണ്ട്. ചിലരെ വ്യാജനിയമന ഉത്തരവ് നല്കി ഡല്ഹിയിലും ഷില്ലോങ്ങിലും വിളിച്ചുവരുത്തി കബളിപ്പിക്കുകയും ചെയ്തിട്ടുണ്ട്. പണം നഷ്ടപ്പെട്ടവര്ക്ക് പരസ്പരം അറിയാതിരുന്നതിനാല് തട്ടിപ്പിന്റെ വ്യാപ്തി ഇപ്പോഴും വ്യക്തമല്ല. പത്തോളം പേര് ഒന്നര വര്ഷം മുന്പ് കൊല്ലം റൂറല് എസ്പിക്ക് മൂന്ന് പ്രാവശ്യവും മുന് മുഖ്യമന്ത്രിക്കും, മുന് ആഭ്യന്തരവകുപ്പ് മന്ത്രിക്കും വിജിലന്സിനും പരാതി നല്കിയിരുന്നു. പരാതി ലഭിച്ചു എന്നറിയിപ്പല്ലാതെ ഒരു നടപടിയും ഉണ്ടായിട്ടില്ലെന്ന് തട്ടിപ്പിന് ഇരയായവര് പറയുന്നു. ഇതിനിടയില് മാതാപിതാക്കളേയും ഭാര്യയെയും നാട്ടില് നിന്ന് മാറ്റിയ ഇയാള് നാട്ടിലെ വീടും വസ്തുവും വില്ക്കുന്നതിനുള്ള ശ്രമവും നടത്തി. ഇതറിഞ്ഞ തട്ടിപ്പിനിരയായവര് രാഷ്ട്രീയപാര്ട്ടികളുടെ സഹായത്തോടെ കൊടികള് നാട്ടി വില്പ്പന തടഞ്ഞു. കോടതിയെ സമീപിക്കാനും തട്ടിപ്പിന് ഇരയായവര് തീരുമാനിച്ചിട്ടുണ്ട്.
