സ്വന്തം ലേഖകന്
കൊല്ലം: നാളെ ആരംഭിക്കാനിരിക്കുന്ന ദക്ഷിണമേഖലാ സ്കൂള് ഗെയിംസിന്റെ ഒരുക്കങ്ങള് മുടന്തുന്നു. മതിയായ പണമില്ലെന്ന കാരണം ചൂണ്ടിക്കാട്ടി കുട്ടികളുടെ ഭക്ഷണകാര്യത്തിലടക്കം ഇനിയും തീരുമാനമെടുക്കാനാകാത്ത അവസ്ഥയിലാണ് സംഘാടകര്
ലക്ഷങ്ങള് മുടക്കി ജില്ലാ സമ്മേളനങ്ങളും പ്രചാരണപരിപാടികളും സംഘടിപ്പിക്കുന്ന ഇടത് വലത് അദ്ധ്യാപകസംഘടനകളാണ് ഗെയിംസിന്റെ നടത്തിപ്പിന് ചുക്കാന് പിടിക്കുന്നത്. എന്നിട്ടും സര്ക്കാര് അനുവദിച്ച രണ്ട് ലക്ഷം രൂപ പങ്കിട്ട് അതില് പരിപാടി ഒതുക്കാനാണ് നീക്കം. അതിന് അപ്പുറത്തേക്ക് കുട്ടികള്ക്ക് ആവശ്യമായവയൊന്നും നല്കാനുള്ള തയ്യാറെടുപ്പിന് പോലും ഇവര് ഒരുക്കമല്ല.
അടുത്തടുത്ത സ്റ്റേഡിയങ്ങളും മൈതാനവും അടക്കമുള്ള സൗകര്യങ്ങള് നോക്കിയാണ് ഗെയിംസിന് ആതിഥ്യമരുളാന് കൊല്ലം തയ്യാറായത്. സ്റ്റേഡിയങ്ങള്ക്കെല്ലാം വാടക നല്കണം. ഹോക്കി സ്റ്റേഡിയത്തിന് 1500 രൂപയും മറ്റുള്ളവയ്ക്ക് ദിവസം 4700 രൂപയുമാണ് വാടക. രണ്ടുദിവസത്തേക്കുള്ള വാടക ജില്ലാഭരണകൂടത്തിന് നല്കിക്കഴിഞ്ഞു. എന്നാല് സ്റ്റേഡിയങ്ങളിലെ ശുചിമുറികള് പ്രവര്ത്തനക്ഷമമല്ല. വെള്ളമില്ല. വൈദ്യുതിയും വിച്ഛേദിക്കപ്പെട്ട നിലയിലാണ്. ഇത്തരം കാര്യങ്ങളിലൊന്നും പരിഹാരം കാണുന്നതിന് സംഘാടകരും ഇതുവരെ നടപടികള് സ്വീകരിച്ചിട്ടില്ല.
കോര്പ്പറേഷന് മേയറാണ് മേളയുടെ സ്വാഗതസംഘം ചെയര്മാന്. പരിമിതികള് ചൂണ്ടിക്കാട്ടിയപ്പോള് ഡെപ്യൂട്ടി മേയറുടെ ഉത്തരം ‘സ്റ്റേഡിയങ്ങളുടെ പരിപാലനം ജില്ലാഭരണകൂടത്തിനാണ്. തങ്ങളുടെ കയ്യില്കിട്ടട്ടെ, എല്ലാം ശരിയാകും’ എന്നായിരുന്നു. എറണാകുളം, കോട്ടയം, ആലപ്പുഴ, ഇടുക്കി, പത്തനംതിട്ട, കൊല്ലം, തിരുവനന്തപുരം ജില്ലകളില് നിന്നാണ് 5, 6, 7 തീയതികളില് നടക്കുന്ന മത്സരങ്ങളില് കുട്ടികള് പങ്കെടുക്കുന്നത്. ആദ്യദിവസം 1694ഉം രണ്ടാംദിവസം 1946ഉം കായികതാരങ്ങള് മത്സരത്തിനിറങ്ങും.
പെണ്കുട്ടികളടക്കമുള്ളവര് മത്സരത്തിനെത്തുന്നുണ്ട്. ഇവരുടെ താമസ സൗകര്യം തയ്യാറായിട്ടുണ്ടെന്നാണ് സംഘാടകരുടെ അവകാശവാദം. മുന്വര്ഷങ്ങളില് കുട്ടികള്ക്കൊപ്പം എത്തിയ രക്ഷകര്ത്താക്കള്ക്ക് താമസം നല്കാനാവാത്തത് പ്രശ്നങ്ങള്ക്കിടയാക്കിയിരുന്നു. അതുകൊണ്ട് ഇക്കുറി രക്ഷകര്ത്താക്കള് വരേണ്ടതില്ലെന്നാണ് തീരുമാനം. എന്നാല് പെണ്കുട്ടികളടക്കമുള്ള ആയിരക്കണക്കിന് കുട്ടികള്ക്ക് ഭക്ഷണവും താമസവും ശുചിമുറിയും പോലും അനിശ്ചിതത്വത്തില് നില്ക്കെ ഇതെങ്ങനെ പ്രായോഗികമാകും എന്നതും ചോദ്യമുയര്ത്തുന്നു.
കെഎസ്ടിഎ, എകെഎസ്ടിയു, കെഎടിഎ, കെഎഎംഎ, ഡിപിഇഐടിഎ, കെയുടിഎ, കെപിഎസ്ടിഎ, കെഎടിഎഫ്, കെഎസ്ടിയു എന്നീ ഭരണ, പ്രതിപക്ഷ അദ്ധ്യാപകസംഘടനകളാണ് ഗെയിംസ് നടത്തിപ്പ് വീതംവെച്ചെടുത്തിരിക്കുന്നത്. എന്നിട്ടും ജില്ലയിലെ മുന്നൂറോളം കായികതാരങ്ങള് പണമില്ലാത്തതുമൂലം ജേഴ്സിയില്ലാതെയാണ് മത്സരിക്കുന്നത്. മന്ത്രിയും എംഎല്എമാരും കോര്പ്പറേഷന് ഭരണസംവിധാനവും ഉണര്ന്നാല് നിഷ്പ്രയാസം പരിഹരിക്കാവുന്ന പ്രശ്നമാണ് അലസതയും കെടുകാര്യസ്ഥതയും മൂലം വഷളാകുന്നത്.
