കണ്ണൂര്: തെരുവുനായ ശല്യം നേരിടുന്നതിന്റെ ഭാഗമായി ജില്ലയില് നടപ്പാക്കുന്ന ആനിമല് ബര്ത്ത് കണ്ട്രോള് (എ.ബി.സി) പദ്ധതി നാളെ ആരംഭിക്കുമെന്ന് ജില്ലാ പഞ്ചായത്ത് പ്രസിഡന്റ് കെ.വി സുമേഷ് അറിയിച്ചു. ലോക പേവിഷബാധ ദിനത്തോടനുബന്ധിച്ച് മൃഗസംരക്ഷണ വകുപ്പ് പദ്ധതിയുമായി ബന്ധപ്പെട്ട് സംഘടിപ്പിച്ച ശില്പശാല ഉദ്ഘാടനം ചെയ്ത് സംസാരിക്കുകയായിരുന്നു അദ്ദേഹം. നായകള്ക്ക് വന്ധ്യംകരണ ശസ്ത്രക്രിയ നടത്തുന്നതിനും പേവിഷബാധയ്ക്കെതിരായ കുത്തിവയ്പ്പ് നടത്തുന്നതിനുമുള്ള സംവിധാനങ്ങള് പാപ്പിനിശ്ശേരിയില് ഒരുങ്ങിക്കഴിഞ്ഞു.
പദ്ധതിയുടെ വിജയകരമായ നടത്തിപ്പിന് തദ്ദേശ സ്ഥാപനങ്ങളുടെ പൂര്ണ സഹകരണം ആവശ്യമാണ്. ഒരു നായയ്ക്ക് 1450 രൂപ എന്ന തോതില് നല്കിയാണ് ബംഗ്ളൂരു ആസ്ഥാനമായ ആനിമല് റൈറ്റ്സ് ഫണ്ട് എന്ന ഏജന്സിയെ പദ്ധതി ഏല്പ്പിച്ചിരിക്കുന്നത്. എല്ലാ പ്രദേശങ്ങളിലെയും തെരുവുനായകളെ വന്ധ്യംകരണ ശസ്ത്രക്രിയക്കും വാക്സിനേഷനും വിധേയമാക്കുന്നുവെന്ന് ഉറപ്പുവരുത്തുന്നതിനായി തദ്ദേശ സ്വയംഭരണ സ്ഥാപനങ്ങള് മോണിറ്ററിംഗ് കമ്മിറ്റികള്ക്ക് ഉടന് രൂപം നല്കണം. പിടികൂടിയ സ്ഥലത്ത് തന്നെ വന്ധ്യംകരിച്ച നായകളെ കൊണ്ടുവിടും. ബന്ധപ്പെട്ട വാര്ഡ് മെമ്പര് ഏജന്സിയുടെ പ്രവര്ത്തനം സാക്ഷ്യപ്പെടുത്തണം. തെരുവുനായ ശല്യം രൂക്ഷമായ പാപ്പിനിശ്ശേരി, അഴീക്കോട്, മയ്യില്, കണ്ണൂര് കോര്പ്പറേഷന് തുടങ്ങിയ പ്രദേശങ്ങളിലാണ് തുടക്കത്തില് പദ്ധതി നടപ്പിലാക്കുക.
എ.ബി.സി പദ്ധതി ഫലവത്താവണമെങ്കില് അറവ് ശാലകളില് നിന്നുള്പ്പെടെയുള്ള മാലിന്യങ്ങള് നിയന്ത്രിക്കാനുള്ള സമാന്തര ശ്രമങ്ങളുണ്ടാവണം. റോഡരികുകളിലും ഒഴിഞ്ഞ പറമ്പുകളിലും മാംസാവശിഷ്ടങ്ങള് നിക്ഷേപിക്കുന്നതാണ് തെരുവുനായ ശല്യം ഇത്രരൂക്ഷമാവാന് കാരണം. ഇത് തടയുന്നതിനുള്ള സമഗ്രപദ്ധതിയും ജില്ലാ പഞ്ചായത്ത് ആസൂത്രണം ചെയ്യുന്നുണ്ട്. മാലിന്യ നിര്മാജന കാര്യത്തില് ജനങ്ങള്ക്കിടയില് ഊര്ജിതമായ ബോധവല്ക്കരണവും പദ്ധതിയുടെ ഭാഗമായി നടക്കും. അടുത്ത ആറു മാസത്തിനകം തെരുവുനായകളുടെ എണ്ണം 60 ശതമാനം കണ്ട് കുറക്കാനാണ് എ.ബി.സി പദ്ധതി യിലൂടെ ലക്ഷ്യമിടുന്നതെന്നും കെ.വി സുമേഷ് പറഞ്ഞു.
വളര്ത്തുനായകളെക്കൂടി പദ്ധതിയുടെ ഭാഗമാക്കും. അവയ്ക്ക് പേവിഷബാധയ്ക്കെതിരായ വാക്സിന് നല്കി ശക്തമായ ലൈസന്സിംഗ് സമ്പ്രദായം ഏര്പ്പെടുത്തുമെന്നും ജില്ലാപഞ്ചായത്ത് പ്രസിഡന്റ് പറഞ്ഞു.
ജില്ലാ പഞ്ചായത്ത് കോണ്ഫറന്സ് ഹാളില് നടന്ന ശില്പശാലയില് ജില്ലാ പഞ്ചായത്ത് വൈസ് പ്രസിഡന്റ് പി.പി ദിവ്യ അധ്യക്ഷയായിരുന്നു. ജില്ലാ പഞ്ചായത്ത് സ്റ്റാന്റിംഗ് കമ്മിറ്റി ചെയര്മാന് കെ.പി ജയബാലന് മാസ്റ്റര്, ജില്ലാ മെഡിക്കല് ഓഫീസര് ഡോ. നാരായണ നായിക്, ഗ്രാമപഞ്ചായത്ത് അസോസിയേഷന് ജില്ലാ പ്രസിഡന്റ് മൈഥിലി രമണന്, സെക്രട്ടറി എ.കെ ചന്ദ്രന് മാസ്റ്റര്, പഞ്ചായത്ത് ഡെപ്യൂട്ടി ഡയരക്ടര് എം.എസ് നാരായണന് നമ്പൂതിരി, ചീഫ് വെറ്ററിനറി ഓഫീസര് ഡോ. ആര് രാജന്, ഡോ. ടി.വി ഉണ്ണികൃഷ്ണന്, പി.കെ രാജന്, ഡോ. ടി.എ ബാബുരാജ് എന്നിവര് സംസാരിച്ചു.
ജില്ലാ മൃഗസംരക്ഷണ ഓഫീസര് ഡോ. പി.പി കണാരന്, എസ്.എല്.ബി.പി ഡെപ്യൂട്ടി ഡയരക്ടര് ഡോ. സി.കെ ഖലീല്, അസിസ്റ്റന്റ് ഡയരക്ടര് ഡോ. പ്രശാന്ത് വി എന്നിവര് ക്ലാസ്സെടുത്തു.
