കൊല്ലം: തിരക്കിനിടയില് രാവിലത്തെ പ്രഭാതഭക്ഷണം ഉണ്ടാക്കാന് പോലും കഴിയാത്ത മലയാളിക്ക് ആശ്വാസമാണ് കടകളില് നിന്നും ലഭിക്കുന്ന പായ്ക്കറ്റ് ചപ്പാത്തികള്. ഇത്തരം ചപ്പാത്തികള് കഴിക്കാന് വരട്ടേ… പായ്ക്കറ്റുകളില് ലഭിക്കുന്ന ചപ്പാത്തികള്ക്ക് ഗുണനിലവാരം ഉപഭോക്താക്കള് ഉറപ്പു വരുത്തണമെന്ന് ഭക്ഷ്യസുരക്ഷാ വകുപ്പ്. വിവിധ പായ്ക്കറ്റുകളില് ചപ്പാത്തികള് വിപണിയില് വ്യാപകമായതോടെയാണ് അധികൃതരുടെ നിര്ദേശം. ജില്ലയിലെ സൂപ്പര്മാര്ക്കറ്റുകളിലും പെട്ടികടകളിലും പല പേരുകളിലും പായ്ക്കറ്റുകളിലും ചപ്പാത്തികള് സുലഭമാണ്. ദിവസങ്ങളോളം കേടുകൂടാതിരിക്കുന്നവയും വിപണിയിലുണ്ട്. കൊല്ലത്ത് വിവിധ പേരുകളില് ചപ്പാത്തി പായ്ക്ക് ചെയ്യുന്ന കവറുകള് വില്ക്കുന്ന കടകളുണ്ട്. ഇവിടെ നിന്നും കവറുകള് തൂക്കി വാങ്ങി കൊണ്ടുപോകുന്നവരാണ് ചപ്പാത്തികള് കടകളില് എത്തിക്കുന്നത്. മിക്കതും ഫുഡ് സേഫ്റ്റിയുടെ ലൈസന്സ് ഇല്ലാത്തവയാണ്. ഇത്തരം ചപ്പാത്തികള് ഗോതമ്പിലും മൈദയിലും തയ്യാറാക്കി കേടുകൂടാതെ ഇരിക്കുന്നതിനായി രാസപദാര്ഥങ്ങളും ചേര്ക്കുമത്രേ. ഇത്തരം സാധനങ്ങള് വില്ക്കുന്നവര്ക്കെതിരെ നടപടിയെടുക്കുമെന്നും ലൈസന്സ് നമ്പരും ബ്രാന്ഡഡ് നെയിം ഉള്ള പായ്ക്കറ്റുകള് മാത്രമേ ഉപഭോക്താക്കള് വാങ്ങാവുവെന്നും ഭക്ഷ്യസുരക്ഷ അധികൃതര് പറയുന്നു.
സ്വിച്ചിട്ടാല് ചപ്പാത്തികള് റെഡി…
മാവ് നനച്ച് പിന്നീട് കുഴച്ച് ഉരുളകളാക്കി പരത്തിയെടുക്കാന് എവിടെ നേരം. ഒന്നാമത് ജോലിക്കാരില്ല. ഇതിനിടയില് ആളുകളുടെ തിരക്കും. ഹോട്ടലുകാരെ കുറ്റപ്പെടുത്തിയിട്ട് കാര്യമുണ്ടോ?. ജില്ലയിലെ വിവിധ ഹോട്ടലുകളില് സ്വച്ചിട്ടാല് ചപ്പാത്തി റെഡിയാണ്. ഗോതമ്പുപൊടി, ചൂടുവെള്ളം, എണ്ണ എന്നിവ യന്ത്രത്തിലേക്കിട്ടുകൊടുത്താല് 15 മിനിറ്റുകൊണ്ട് കുഴയ്ക്കല് ഒ.കെ. കുഴച്ചുകിട്ടിയ മാവ് മിനിറ്റുകള് കൊണ്ട് പരത്തലും പൂര്ത്തിയാക്കും. ഇങ്ങനെ പരത്തി പുറത്തുവരുന്ന ചപ്പാത്തികള് പിന്നെ ചുട്ടെടുക്കുകയേ വേണ്ടൂ. ചപ്പാത്തി മേക്കിങ് യന്ത്രങ്ങളുടെ സഹായത്തോടെയാണ് മിക്ക ഹോട്ടലുകളും ചപ്പാത്തി പുറത്തിറക്കുന്നത്.
നഗരത്തിലെ ചുരുക്കം ചില ഹോട്ടലുകളില് മാത്രമാണ് കൈകൊണ്ടു കുഴച്ചെടുത്ത ചപ്പാത്തികള് ഇപ്പോള് ലഭിക്കുന്നത്. രണ്ട് തരം ചപ്പാത്തി തയാറാക്കുന്ന യന്ത്രങ്ങള് വിപണിയിലുണ്ടെന്നും ലക്ഷങ്ങളാണ് ഇവയുടെ വിലയെന്നും ഹോട്ടല് ഉടമകള് പറയുന്നു.
