ആലപ്പുഴ: ജി. സുധാകരന്റെ കടുത്ത നിലപാടില് പ്രതിഷേധിച്ച് ായിരക്കണക്കിന് സഖാക്കളാണ് കഴിഞ്ഞ മൂന്നു മാസത്തിനകം പാര്ട്ടി വിട്ടതെന്ന് ബിജെപി ജില്ലാ പ്രസിഡന്റ് കെ. സോമന്. പാര്ട്ടി പ്രവര്ത്തകരുടെ ഇടയില് വര്ഗ്ഗീയ വിഷം കുത്തിവച്ച് സിപിഎമ്മിനെ തകര്ക്കുന്നതില് പ്രതിഷേധിച്ചാണ് തോമസ് ഐസക് മന്ത്രിസ്ഥാനം രാജിവയ്ക്കാന് ഒരുങ്ങിയത്.
ന്യൂനപക്ഷ സമുദായങ്ങള്ക്ക് സിപിഎമ്മില് നിലനില്പില്ലാഞ്ഞിട്ട് പാര്ട്ടി വിട്ട് നിരവധി സഖാക്കള് ബിജെപിയില് ചേര്ന്നത് സുധാകരന് വ്യക്തമായി അറിയാം. സുധാകരന്റെ വിശ്വസ്തരാണ് ബിജെപിയില് അംഗത്വമെടുത്ത് പ്രവര്ത്തിച്ചുവരുന്നത്. സിപിഎം ജില്ലാ സെക്രട്ടറിയേറ്റ് യോഗത്തില് ഒരു മുസ്ലീം നേതാവിന് എന്ഡിഎഫ് ബന്ധമുണ്ടെന്ന് ആരോപിച്ചതും സുധാകരനാണ്.
മതേതരത്വത്തിന്റെ മുഖംമൂടിയണിഞ്ഞ സുധാകരന് കടുത്ത വര്ഗ്ഗീയ വാദിയാണെന്നും കെ. സോമന് കുറ്റപ്പെടുത്തി. ഹരിപ്പാട്ടും അമ്പലപ്പുഴയില് കോണ്ഗ്രസുമായി ചേര്ന്ന് വോട്ടുകച്ചവടം നടത്തിയതും സുധാകരനാണ്. സുധാകരന്റെ കള്ളക്കച്ചവടം എല്ഡിഎഫ് യോഗത്തില് സിപിഐ ചര്ച്ച ചെയ്യണമെന്ന് ആവശ്യപ്പെട്ടപ്പോഴാണ് ഹരിപ്പാട്ടെ മെഡിക്കല് കോളേജ് പ്രശ്നം വിവാദമാക്കാന് സുധാകരന് ശ്രമിച്ചത്.
ചെന്നിത്തലയെ സിപിഎം ഹരിപ്പാട്ട് സഹായിച്ചപ്പോള് അമ്പലപ്പുഴയില് കോണ്ഗ്രസ് സുധാകരനെയും സഹായിച്ചു. ഇത് സുധാകരന്റെ ഇരട്ടത്താപ്പ് നയമാണ് വ്യക്തമാക്കുന്നത്. അല്ലെന്നു തെളിയിക്കാന് സുധാകരന് കഴിയുമോയെന്ന് ബിജെപി വെല്ലുവിളിക്കുന്നതായി കെ. സോമന് പ്രസ്താവനയില് അറിയിച്ചു.
