തളിപ്പറമ്പ്: അടുത്ത നിയമസഭാ തെരഞ്ഞെടുപ്പോടുകൂടി ബിജെപി കേരളത്തില് ഭരണത്തിലേറുമെന്ന് കേന്ദ്രമന്ത്രി സദാനന്ദഗൗഡ പ്രസ്താവിച്ചു. തളിപ്പറമ്പ് രാജരാജേശ്വര ക്ഷേത്രത്തില് ദര്ശനം നടത്തിയശേഷം മാധ്യമങ്ങളോട് സംസാരിക്കുകയായിരുന്നു അദ്ദേഹം. കേരളത്തില് ഗുണ്ടായിസ രാഷ്ട്രീയമാണ് സിപിഎം ഇപ്പോള് നടത്തിക്കൊണ്ടിരിക്കുന്നത്. കേരളത്തിലെ 90 ശതമാനം ജനങ്ങളും ഈ ഗുണ്ടാരാഷ്ട്രീയം മടുത്തുകഴിഞ്ഞുവെന്നും നരേന്ദ്രമോദിയുടെ നേതൃത്വത്തിലുള്ള കേന്ദ്രഭരണം ജനഹൃദയങ്ങളില് വേരുറപ്പിച്ചുകഴിഞ്ഞുവെന്നും കേരളത്തിലും ഇതിന്റെ മാറ്റം കണ്ടുതുടങ്ങിയതായും അദ്ദേഹം പറഞ്ഞു.
കേരളത്തില് കഴിഞ്ഞ നിയമസഭാ തെരഞ്ഞെടുപ്പില് എന്ഡിഎ മുന്നണിക്കുണ്ടായ വോട്ടുവളര്ച്ച അതാണ് തെളിയിക്കുന്നതെന്നും അദ്ദേഹം കൂട്ടിച്ചേര്ത്തു. ബിജെപി നേതാക്കളായ അശോക് റായ്, സി.വി.പൊതുവാള്, പി.ബാലകൃഷ്ണന് മാസ്റ്റര്, എ.പി.ഗംഗാധരന്, എ.കെ.ഇ.ചന്ദ്രശേഖരന് മാസ്റ്റര്, ടി.ടി.സോമന്, രവീന്ദ്രന് കടമ്പേരി, എ.പി.നാരായണന്, എം.രാഘവന് എന്നിവരും മന്ത്രിക്കൊപ്പമുണ്ടായിരുന്നു. തളിപ്പറമ്പ് അസിസ്റ്റന്റ് തഹസില്ദാര് സുജാതയുടെ നേതൃത്വത്തില് ഉന്നത ഉദ്യോഗസ്ഥരും പോലീസ് സംഘവും അദ്ദേഹത്തോടൊപ്പമുണ്ടായിരുന്നു.
ടിടികെ ദേവസ്വം പ്രസിഡണ്ട് ഹരിജയന്തന് നമ്പൂതിരി, എക്സിക്യൂട്ടീവ് ഓഫീസര് മുല്ലപ്പള്ളി നാരായണന് എന്നിവര് ചേര്ന്ന് പൊന്നാടയണിയിച്ച് മന്ത്രിയെ സ്വീകരിച്ചു. തുടര്ന്ന് തൃച്ചംബരം ശ്രീകൃഷ്ണക്ഷേത്രം, പറശ്ശിനിക്കടവ് മുത്തപ്പന് മടപ്പുര, മാടായിക്കാവ് എന്നിവിടങ്ങളിലും സദാനന്ദഗൗഡ ദര്ശനം നടത്തി.
