അടിമാലി: വനവാസികളുടെ ക്ഷേത്രാരാധന തടഞ്ഞും ക്ഷേത്രം അലങ്കോലപ്പെടുത്തിയും വനംവകുപ്പിന്റെ ധിക്കാരം. അടിമാലി കൊരങ്ങാട്ടി വനവാസി സെറ്റില്മെന്റിന്റെ ഭാഗമായ നൂറാംകരയിലാണ് സംഭവം. പതിറ്റാണ്ടുകളായി പരദേവതയായ ഉപാസനാമൂര്ത്തിയെ മുതുവാന്, ഗോത്രവിഭാഗത്തില്പ്പെട്ടവര് വച്ചാരാധിച്ചിരുന്ന ക്ഷേത്രമാണ് അകാരണമായി വനംവകുപ്പ് നശിപ്പിച്ചത്. വനാവസികള് ആരാധനയ്ക്ക് എത്തിയപ്പോള് തടയുകയും ചെയ്തു.
വനംവകുപ്പിന്റെ ഏകപക്ഷീയമായ ഹിന്ദുവിരുദ്ധ നിലപാടിനെതിരെ പ്രതിഷേധം ശക്തമാവുകയാണ്. ഭരണപക്ഷത്തുള്ള ചിലരുടെ ആസൂത്രിതമായ നീക്കമാണ് ഇതിന് പിന്നിലെന്ന് ആരോപണമുണ്ട്.
ഹൈന്ദവ ആചാരവും വിശ്വാസവും അനുഷ്ഠിച്ച് ജീവിക്കുന്ന വനവാസി സമൂഹത്തിന്റെ ആചാരാനുഷ്ഠാനങ്ങള്ക്കെതിരെയുള്ള വനംവകുപ്പിന്റെ നടപടികള്ക്കെതിരെ ശക്തമായ നടപടികളുമായി മുന്നോട്ട് പോകുമെന്ന് വനവാസി വികാസകേന്ദ്രം ഭാരവാഹികള് അറിയിച്ചു. പെന്തക്കോസ്ത് ഉള്പ്പെടെയുള്ള ക്രൈസ്തവ വിശ്വാസികള് കോളനികള് കേന്ദ്രീകരിച്ച് സംഘര്ഷം ഉണ്ടാക്കും വിധം പ്രവര്ത്തനം നടത്തുമ്പോഴാണ് കാടിന്റെ മക്കളുടെ ക്ഷേത്രം തകര്ന്ന് ആരാധന മുടക്കിയ സ്ഥിതിയുണ്ടാക്കിയിരിക്കുന്നത്.
