കണ്ണൂര്: സാമൂഹ്യദ്രോഹികളില് നിന്നും നിന്തരമായി അക്രമത്തിന് വിധേയനായിക്കൊണ്ടിരിക്കുന്ന തനിക്കും കുടുംബത്തിനും ജീവിക്കാനുളള സാഹചര്യം സൃഷ്ടിച്ചു തരണമെന്നാവശ്യപ്പെട്ട് പരിസ്ഥിതി പ്രവര്ത്തകന് ഭാസ്കരന് വെള്ളൂര് കുടുംബസമേതം ഇന്നലെ കണ്ണൂര് കലക്ട്രേറ്റ് പടിക്കല് സൂചനാ ഉപവാസം നടത്തി. പരിസ്ഥിതി പ്രവര്ത്തനം തുടങ്ങിയ കാലംമുതല് പതിനാറോളം അക്രമങ്ങളും ഭീഷണിയും മറ്റു ദ്രോഹങ്ങളും തനിക്കെതിരെ ഉണ്ടായിട്ടുണ്ടെന്നും ഹരിതരാഷ്ട്രീയത്തിനു വേണ്ടി പ്രവര്ത്തിക്കുന്നതു കൊണ്ടാണ് താന് നിരന്തരം അക്രമിക്കപ്പെടുന്നതെന്നും നീതിക്കു വേണ്ടി ഏതറ്റംവരേയും മുന്നോട്ടു പോകുമെന്നും അദ്ദേഹം സമര പന്തലില് വെച്ച് ജന്മഭൂമിയോട് പറഞ്ഞു.
തനിക്കും കുടുംബത്തിനുമെതിരായ അക്രമങ്ങളില് പോലീസ് വേണ്ടത്ര ഗൗരവത്തില് നടപടി സ്വീകരിക്കന്നില്ല. വീട്ടുകാര് നാടുവിട്ടുപോകാന് സ്വയം നിര്ബന്ധിതരായിരിക്കുകയാണ്. കുടിവെള്ളത്തിനും പ്രകൃതിസുരക്ഷക്കും വരുന്ന തലമുറയുടെ നിലനില്പ്പിനുവേണ്ടിയും പ്രവര്ത്തിക്കുന്നവര്ക്ക് നിരന്തരം പീഡനം ഏറ്റുവാങ്ങേണ്ടിവരികയാണെന്നും ഇതില് പ്രതിഷേധം രേഖപ്പെടുത്തുന്നതിനും കൂടിയാണ് ഉപവാസസമരമെന്നും അദ്ദേഹം പറഞ്ഞു. നടപടികള് ഉണ്ടാകുന്നില്ലെങ്കില് സെക്രട്ടറിയേറ്റുപടിക്കലും രാഷ്ട്രപതിഭവനു മുന്നിലും സമരം നടത്തുമെന്നും സമരത്തില് പങ്കെടുത്ത പരിസ്ഥിതി പ്രവര്ത്തകര് പറഞ്ഞു. സി.ആര്.നീലകണ്ഠന് സമരം ഉദ്ഘാടനം ചെയ്തു. ഡി.സുരേന്ദ്രനാഥ് അധ്യക്ഷത വഹിച്ചു. പളളിപ്രം പ്രസന്നന്, കെ.സി.ഉമേഷ്ബാബു, പി.മുരളി തുടങ്ങിയ പരിസ്ഥിതി പൗരാവകാശ പ്രവര്ത്തകരും പങ്കെടുത്തു. എന്.സുശാന്ത് സ്വാഗതം പറഞ്ഞു.
