ന്യൂദല്ഹി: ലിയാന്ഡര് പേസിന് ലോക ടെന്നീസിലെ മുന്നിരക്കാരിലൊരാളായ റാഫേല് നദാലിന്റെ പ്രശംസ. മികച്ച ടെന്നീസ് താരങ്ങളിലൊരാളായ പേസ്, ഡബിള്സിലെ ഇതിഹാസ താരമെന്നു നദാല് പറഞ്ഞു. ഡേവിസ് കപ്പ് ടെന്നീസ് ഡബിള്സില് ഇന്ത്യയെ തോല്പ്പിച്ച ശേഷം സംസാരിക്കുകയായിരുന്നു നദാല്. ഡബിള്സ് ജയത്തോടെ 3-0ന് ലീഡ് നേടി സ്പെയ്ന് ലോക ഗ്രൂപ്പിലെത്തി. ഇന്നലെ നടന്ന രണ്ടു റിവേഴ്സ് സിംഗിള്സുകളും ജയിച്ച സ്പാനിഷ് പട 5-0ന്റെ സമ്പൂര്ണ ജയം കുറിച്ചു.
പേസിനെതിരെ ഇന്ത്യയില് കളിക്കാനായതില് സന്തോഷം. അദ്ദേഹം നന്നായി കളിച്ചു. ഈ രാത്രി ഒരിക്കലും മറക്കില്ല- നദാല് പറഞ്ഞു. ഒളിമ്പിക് സ്വര്ണ മെഡല് ജേതാക്കള് കൂടിയായ നദാല്-മാര്ക്ക് ലോപ്പസ് സഖ്യം ലിയാന്ഡര് പേസ്-സാകേത് മൈനേനി കൂട്ടുകെട്ടിനെ കീഴടക്കിയാണ് സ്പെയിനിനെ ലോക ഗ്രൂപ്പില് എത്തിച്ചത്, സ്കോര്: 6-4, 7-6, 6-4, 6-4. നേരത്തെ, ആദ്യ രണ്ടു ഡബിള്സിലും തോറ്റ ഇന്ത്യയ്ക്ക് ഡബിള്സ് ജയിച്ചാല് മാത്രമേ പ്രതീക്ഷയുണ്ടായിരുന്നുള്ളു.
അപ്രധാനമായ റിവേഴ്സ് സിംഗിള്സുകളിലും ഇന്ത്യയ്ക്ക് അടിപതറി. ആദ്യത്തേതില് മാര്ക്ക് ലോപസ്, സുമിത് നഗലിനെ കീഴടക്കി, സ്കോര്: 6-3, 1-6, 6-3. രണ്ടാമത്തേതില് ഡേവിഡ് ഫെറര്, രാംകുമാര് രാമാനാഥനെ തുരത്തി, സ്കോര്: 6-2, 6-2.
