ബാഴ്സലോണ: സ്പാനിഷ് ലീഗ് ഫുട്ബോളില് നിലവിലെ ചാമ്പ്യന്മാരായ ബാഴ്സലോണക്ക് മിന്നുന്ന വിജയം. ഇന്നലെ നടന്ന മത്സരത്തില് ഒന്നിനെതിരെ അഞ്ച് ഗോളുകള്ക്ക് അവര് ലീഗിലെ നവാഗതരായ ലഗാനസിനെ തകര്ത്തു. സൂപ്പര് താരങ്ങളായ മെസ്സി-സുവാരസ്-നെയ്മര് കൂട്ടുകെട്ടാണ് ബാഴ്സക്ക് ജയം സമ്മാനിച്ചത്.
മെസ്സി രണ്ട് ഗോള് നേടിയപ്പോള് സുവാരസും നെയ്മറും ഓരോന്ന് സ്വന്തമാക്കി. റാഫീഞ്ഞയാണ് മറ്റൊരു േോള് നേടിയത്. കഴിഞ്ഞയാഴ്ച ആല്വസിനോട് സ്വന്തം മൈതാനത്ത് ഒന്നിനെതിരെ രണ്ട് ഗോളുകള്ക്ക് അട്ടിമറിക്കപ്പെട്ട ബാഴ്സലോണ ഇന്നലെ ഉജ്ജ്വല പ്രകടനമാണ് നടത്തിയത്. തുടക്കം മുതല് എതിര്പ്രതിരോധത്തെ പിച്ചിചീന്തിയ ബാഴ്സയെ 15-ാം മിനിറ്റില് തന്നെ മെസ്സി മുന്നിലെത്തിച്ചു. 31-ാം മിനിറ്റിലായിരുന്നു സുവാരസിന്റെ ഗോള്. 44-ാം മിനിറ്റില് നെയ്മറും ലക്ഷ്യം കണ്ടതോടെ ആദ്യപകുതിയില് 3-0ന് കറ്റാലന്സ് മുന്നില്.
പിന്നീട് 55-ാം മിനിറ്റില് ലഭിച്ച പെനാല്റ്റി ലക്ഷ്യത്തിലെത്തിച്ച് മെസ്സി തന്റെ രണ്ടാമത്തെയും ടീമിന്റെ നാലാം ഗോളും നേടി. 64-ാം മിനിറ്റില് റാഫീഞ്ഞോയും ലക്ഷ്യം കണ്ടതോടെ ബാഴ്സയുടെ ഗോള്പട്ടിക പൂര്ണ്ണം. 80-ാം മിനിറ്റില് ലഗാനസിന്റെ ആശ്വാസഗോള്. തകര്പ്പന് ഫ്രീകിക്കിലൂടെ ഗബ്രിയേലാണ് ഗോള് നേടിയത്. വിജയത്തോടെ ബാഴ്സലോണ 9 പോയിന്റുമായി പട്ടികയില് ഒന്നാമതെത്തി.
മറ്റൊരു മത്സരത്തില് റയല് ബെറ്റിസും ഗ്രനാഡയും സമനിലയില് പിരിഞ്ഞു. ഇരുടീമുകളും രണ്ട് ഗോള് വീതം നേടി. ഗ്രനാഡക്കായി ഗൊണ്സാലസും ബ്യൂനോയും ഗോള് നേടിയപ്പോള് ബെറ്റിസിന്റെ രണ്ട് ഗോളുകളും മൊറേനോയുടെ ബൂട്ടില്നിന്ന്.
