ന്യൂദല്ഹി: കേരളത്തില് സിപിഎമ്മിന്റെ നേതൃത്വത്തില് നടമാടുന്ന ഇടതു ഭീകരതയ്ക്കെതിരെ സപ്തംബര് 17ന് രാജ്യത്തെ വിവിധ നഗരങ്ങളില് പ്രതിഷേധ പരിപാടികള് നടക്കും. അഖിലഭാരതീയ മലയാളി സംഘിന്റെ നേതൃത്വത്തിലാണ് പ്രതിഷേധക്കൂട്ടായ്മകള് സംഘടിപ്പിച്ചത്.
ജനാധിപത്യത്തില് ലഭ്യമാകേണ്ട സംസാരിക്കാനുള്ള സ്വാതന്ത്ര്യത്തിന് വേണ്ടിയും പ്രവര്ത്തിക്കാനുള്ള സ്വാതന്ത്ര്യത്തിനു വേണ്ടിയുമാണ് കേരളത്തിലെ സംഘപരിവാര് സംഘടനകള് പോരാടുന്നത്. നൂറുകണക്കിന് പേരാണ് ഇടതു സംഘടനകളുടെ അക്രമത്തില് കേരളത്തില് കൊല്ലപ്പെട്ടത്. നിരവധി ആര്എസ്എസ്-ബിജെപി പ്രവര്ത്തകരും കൊല്ലപ്പെട്ടു. ആയിരത്തോളം പേര് അതിക്രൂരമായ ആക്രമണങ്ങള്ക്ക് വിധേയമായി കഴിയുന്നു.
സംസ്ഥാനത്തെ ഇടത് ആക്രമണങ്ങള് ജനശ്രദ്ധയിലെത്തിക്കാനാണ് രാജ്യത്തെ പ്രധാന നഗരങ്ങളില് മെഴുകുതിരി തെളിയിച്ച് 17ന് പ്രതിഷേധ പരിപാടികള് നടത്തുന്നത്. പരുമല പമ്പ ദേവസ്വം ബോര്ഡ് കോളേജില് എബിവിപി പ്രവര്ത്തകരായ മൂന്നു വിദ്യാര്ത്ഥികളെ കല്ലെറിഞ്ഞ് പമ്പയില് മുക്കി കൊലപ്പെടുത്തിയ സംഭവത്തിന്റെ ഇരുപതാം വാര്ഷികമാണ് അന്ന്. 1996 സപ്തംബര് 17നായിരുന്നു രാജ്യത്തെ നടുക്കിയ കൊലപാതകം പരുമല കോളജില് അരങ്ങേറിയത്.
ദല്ഹിയില് 17ന് വൈകിട്ട് 6.30ന് ജന്ദര്മന്തറില് നൂറുകണക്കിന് പ്രവര്ത്തകര് മെഴുകുതിരികളുമായി പ്രതിഷേധത്തില് അണിനിരക്കും. എബിവിപി, വിഎച്ച്പി, സ്വദേശി ജാഗരണ് മഞ്ച്, നവോദയം തുടങ്ങിയ സംഘടനകളുടെ പ്രവര്ത്തകര് പരിപാടിയില് പങ്കെടുക്കും.
