തിരൂര്: ഒഴൂരിലും പരിസര പ്രദേശങ്ങളിലും അശാന്തി പടര്ത്തി സിപിഎം വീണ്ടും അക്രമം അഴിച്ചുവിടുന്നു. ഒഴൂരില് ആര്എസ്എസ് താലൂക്ക് സംഘചാലക് ദേവദാസന്റെ വീട് കഴിഞ്ഞ ദിവസം ഒരു സംഘം സിപിഎമ്മുകാര് അടിച്ചുതകര്ത്തു. യാതൊരു പ്രകോപനവുമില്ലാതെ പ്രശ്നങ്ങള് സൃഷ്ടിക്കാനാണ് സിപിഎം ശ്രമിക്കുന്നത്. ഉണ്യാല്, താനൂര്, വെട്ടം മേഖലകളില് ഏതാനും മാസങ്ങളായി സിപിഎം അഴിഞ്ഞാടുകയാണ്.
ഒഴൂരില് അക്രമം നടത്തിയവരെ മുഴുവന് മനസിലായിട്ടും അവരെ അറസ്റ്റ് ചെയ്യാന് പോലീസ് തയ്യാറാകുന്നില്ല. എല്ഡിഎഫ് അധികാരത്തില് വന്നശേഷം കേരളത്തിന്റെ വിവിധ പ്രദേശങ്ങളിലും സിപിഎം കൊലപാതകവും അക്രമവും പരക്കെ അഴിച്ചുവിട്ടിരിക്കുകയാണ്. അതിന്റെ തുടര്ക്കഥയെന്നപോലെ ആര്എസ്എസ് താലൂക്ക് സംഘചാലക് ഒഴൂര് ദേവദാസന്റെ വീട് സിപിഎം അക്രമികള് തകര്ത്തിരിക്കുന്നത്.
ആര്എസ്എസ്-ബിജെപി പ്രവര്ത്തകരെ മാത്രം ലക്ഷ്യം വെച്ച് സിപിഎം നടത്തുന്ന അക്രമം നിലനില്പ്പിന് വേണ്ടിയുള്ളതാണ്. കാരണം സംസ്ഥാന സര്ക്കാരിന്റെ ജനദ്രോഹ ഭരണത്തിലും പാര്ട്ടിയുടെ അക്രമ രാഷ്ട്രീയത്തിലും മനം മടുത്ത് സിപിഎം പ്രവര്ത്തകര് കൊഴിഞ്ഞുപോകുകയാണ്. അണികളെ ഭയപ്പെടുത്തി പിടിച്ചുനിര്ത്താനുള്ള സിപിഎമ്മിന്റെ തന്ത്രമാണ് ഈ അക്രമപരമ്പര. ആര്എസ്എസ് പ്രവര്ത്തകര് തിരിച്ചടിക്കാത്തതിനാല് പ്രശ്നങ്ങള് വഷളാകുന്നില്ലെന്ന് മാത്രം.
സിപിഎം അക്രമത്തില് പ്രതിഷേധിച്ച് ഒഴൂരില് ആര്എസ്എസ് പ്രവര്ത്തകര് പ്രതിഷേധ പ്രകടനം നടത്തി.
