അയർലൻഡിൽ ബിയർ ‘ടെസ്റ്ററെ’ ആവശ്യമുണ്ട്

ബിയർ കുടിയന്മാരുടെ ശ്രദ്ധയ്‌ക്ക്, ഒരു രൂപ പോലും ചിലവാക്കാതെ നിങ്ങൾക്ക് മതിവരുവോളം ബിയർ കുടിക്കാം. രാവിലെ തുടങ്ങി വൈകീട്ട് വരെ പല തരത്തിലുള്ള മധു നുകർന്ന് ജീവിതം ആസ്വദിക്കാം. ഇത് സത്യം തന്നെയാണ് കേട്ടോ, അയർലൻഡിലെ പ്രശസ്തമായ മദ്യനിര്‍മ്മാണ കമ്പനിയിലേക്ക് ബിയർ ടെസ്റ്ററെ ആവശ്യമുണ്ട്. അപ്പോൾ പിന്നെ പറയണ്ടല്ലോ എന്താണ് ജോലി എന്നത്.

വടക്കൻ അയർലൻഡിലെ ലണ്ടൻടെറി പ്രദേശത്തെ ഒരു മദ്യനിര്‍മ്മാണ കമ്പനി അടുത്തിടെ ഡെറി ജേണലിൽ ബിയർ ടെസ്റ്ററെ ആവശ്യമുണ്ടെന്ന പരസ്യം നൽകിയിരുന്നു. എല്ലാ മാസവും വാഹനങ്ങളിൽ എത്തുന്ന 40 ചരക്ക് ബിയർ കുടിച്ച് അവയുടെ രുചി വൈവിധ്യങ്ങൾ വിലയിരുത്തി കമ്പനിക്ക് റിപ്പോർട്ട് കൈമാറണമെന്നതാണ് ടെസ്റ്ററുടെ പ്രധാന ജോലി എന്ന് പത്രപ്പരസ്യത്തിൽ വ്യക്തമാക്കുന്നുണ്ട്.

പല തരത്തിലുള്ള രുചികൾ എളുപ്പത്തിൽ മനസിലാക്കാൻ കഴിവുള്ളവരെയാണ് കമ്പനി അന്വേഷിക്കുന്നത്. തിരഞ്ഞെടുക്കുന്നവർക്ക് പ്രത്യേക പരിശീലനവും കമ്പനി നൽകുന്നുണ്ട്. പത്രത്തിൽ പരസ്യം നൽകിയതിനു ശേഷം 137 ഉദ്യോഗാർത്ഥികൾ കമ്പനിക്ക് അപേക്ഷ നൽകിയിട്ടുണ്ടെന്ന് സിഇഒ അറിയിച്ചു.

എന്നാൽ തിരഞ്ഞെടുക്കുന്നവർക്ക് ശമ്പളം നൽകാൻ കമ്പനി ഒരുക്കമല്ല, മറിച്ച് സൗജന്യവും ഭക്ഷണവും രാവിലെയും വൈകീട്ടും താമസ സ്ഥലത്ത് നിന്നും കൊണ്ടു വരാനും തിരിച്ചെത്തിക്കാനും കമ്പനി ഒരുക്കമാണ്.