പാലാ: ശ്രീനാരായണ ഗുരുവിന്റെ നവോത്ഥാന ആശയങ്ങളെ പിന്തുടരുന്നുവെന്ന് നടിക്കുന്നവര് ഗുരുദേവനെ ചവിട്ടിമെതിക്കുകയാണെന്ന് എസ്എന്ഡിപി യോഗം അസി. സെക്രട്ടറി പി.ടി. മന്മഥന്. അഡ്വ. കെ.എം. സന്തോഷ്കുമാറിന്റെ അറസ്റ്റില് പ്രതിഷേധിച്ച് എസ്എന്ഡിപിയോഗം മീനച്ചില് യൂണിയന്റെ നേതൃത്വത്തില് പാലായില് നടത്തിയ പ്രതിഷേധ സമ്മേളനം ഉദ്ഘാടനം ചെയ്യുകയായിരുന്നു അദ്ദേഹം.
ഞങ്ങള്ക്കെതിര് നില്ക്കുന്നവരെ ഞങ്ങള് വീഴ്ത്തും എന്ന നിലപാടാണ് സിപിഎമ്മിന്റേത്. നമുക്ക് ജാതിയില്ലെന്ന് ശ്രീനാരായണഗുരുദേവന് പറഞ്ഞിട്ടുണ്ടെന്ന് പറഞ്ഞ് സിപിഎം തങ്ങളുടെ ജാഥയ്ക്ക് നീളം കൂട്ടാന് രാഷ്ട്രീയമായി ഉപയോഗിക്കുകയാണ്. സിപിഎമ്മിന്റെ തന്നിഷ്ടത്തിന് പോലീസിനെ ഉപയോഗിക്കുകയാണ്. സന്തോഷിന്റെ അറസ്റ്റ് മനുഷ്യാവകാശ ലംഘനമാണെന്നും ഇതില് പോലീസിനെതിരെ കേസ് കൊടുക്കും. മീനച്ചില് താലൂക്കിലെ ചതയദിനാഘോഷം തകര്ക്കാനുള്ള ഗൂഢാലോചനയും അറസ്റ്റിനുപിന്നിലുണ്ടെന്ന് പി.ടി. മന്മഥന് പറഞ്ഞു. സന്തോഷിന് നീതി ലഭിച്ചില്ലെങ്കില് വന് പ്രക്ഷോഭത്തിന് എസ്എന്ഡിപിയോഗം മുന്നോട്ടുവരും. അതിന്റെ ചെറിയൊരു പതിപ്പാണിവിടെ നടന്നതെന്നും അദ്ദേഹം പറഞ്ഞു. കോട്ടയം യൂണിയന് പ്രസിഡന്റ് എ.ജി. തങ്കപ്പന് അദ്ധ്യക്ഷത വഹിച്ചു.
