കൊച്ചി: മുണ്ടുടുത്ത് മലയാളം പറഞ്ഞ് മാസ്റ്റര് ബ്ലാസ്റ്റര് വീണ്ടും കൊച്ചിയില്. കസവുമുണ്ടും മഞ്ഞ ജേഴ്സിയുമണിഞ്ഞ് കേരള ശൈലിയിലെത്തിയ സച്ചിന് ഐഎസ്എല് മൂന്നാം സീസണിലേക്കുള്ള ബ്ലാസ്റ്റേഴ്സ് ടീമിനെ അവതരിപ്പിച്ചു. ‘എല്ലാവര്ക്കും നമസ്കാരം’ എന്നു പറഞ്ഞാണ് സച്ചിന് പ്രസംഗം ആരംഭിച്ചത്.
പുതിയ സീസണില് ബ്ലാസ്റ്റേഴ്സിന് മികച്ച പ്രകടനം നടത്താന് കഴിയുമെന്നാണ് പ്രതീക്ഷിക്കുന്നതെന്നും സഹ ഉടമകൂടിയായ സച്ചിന് പറഞ്ഞു. രണ്ടാം സീസണിലെ അനുഭവങ്ങള് മറന്ന് പുതിയ സീസണ് താരങ്ങള് നന്നായി ആസ്വദിക്കുമെന്നാണ് പ്രതീക്ഷ. തുടക്കം മുതല് ടീമിനെ പിന്തുണച്ച എല്ലാവര്ക്കും നന്ദിയുണ്ട്. ഒരു താരത്തിന്റെ വികാരവും ആകാംക്ഷയും എനിക്ക് മനസ്സിലാകും. ക്രിക്കറ്റില് ഞാന് അത് അനുഭവിച്ചതാണ്.
ബ്ലാസ്റ്റേഴ്സിന്റെ ആദ്യ സീസണില് ലഭിച്ച പിന്തുണയും സഹകരണവും വാക്കുകളില് വിവരിക്കാനാവില്ല. ആരാധകരാണ് ടീമിന്റെ കരുത്തെന്നും തുടര്ന്നും പിന്തുണ വേണമെന്നും അദ്ദേഹം പറഞ്ഞു. ചടങ്ങില് ബ്ലാസ്റ്റേഴ്സിന്റെ ജഴ്സിയും സച്ചിന് പരിചയപ്പെടുത്തി.
സച്ചിനോടൊപ്പം ടീമിന്റെ സഹ ഉടമകളായ ചിരഞ്ജീവി, നാഗാര്ജുന, അല്ലു അരവിന്ദ്, നിമ്മഗദ്ദ പ്രസാദ് എന്നിവരും കസവുമുണ്ട് ഉടുത്തായിരുന്നു എത്തിയത്.
