കൊല്ലം: പൊതുസ്ഥാപനമായ ജില്ലാ ആശുപത്രിയില് മയ്യത്ത് പള്ളി നിര്മാണത്തിനായി ജില്ലാ പഞ്ചായത്ത് ഉള്പ്പെടെയുള്ള അധികാരികള് നടത്തുന്ന നീക്കങ്ങള് അനുവദിക്കില്ലെന്ന് ആര്എസ്എസ് കൊല്ലം വിഭാഗ് കാര്യകാരി സദസ്യന് വി.മുരളീധരന്. ജില്ലാ ആശുപത്രി പടിക്കല് ഹിന്ദുഐക്യവേദി നടത്തിയ കൂട്ടധര്ണ ഉദ്ഘാടനം ചെയ്യുകയായിരുന്നു അദ്ദേഹം. മതേതരത്വത്തിന്റെ മറവിലുള്ള ഇത്തരം പ്രീണനസമീപനങ്ങള് പ്രതിഷേധാര്ഹമാണ്. പുറ്റിങ്ങല് ദുരന്തം നടന്നപ്പോള് കൊല്ലം ജില്ലാ ആശുപത്രിയിലെ മോര്ച്ചറിയുടെ ദയനീയത എല്ലാവര്ക്കും ബോധ്യപ്പെട്ടതാണ്. കഷ്ടിച്ച് 12 മൃതദേഹങ്ങള് കൈകാര്യം ചെയ്യാന് സൗകര്യമുള്ള മോര്ച്ചറിയില് 108 മൃതദേഹങ്ങളാണ് അന്ന് കൈകാര്യം ചെയ്തത്. അതിന് വേണ്ട എല്ലാ സഹായസഹകരണങ്ങളും നല്കിയ പ്രസ്ഥാനമാണ് സേവാഭാരതി. എന്നാല് ഭൂരിഭാഗവും ന്യൂനപക്ഷസമുദായംഗങ്ങളാണെന്നതിന്റെ ആനൂകൂല്യം തരമായെടുത്ത് ജില്ലാ ആശുപത്രി വികസനകമ്മിറ്റിയില് മയ്യത്ത്പള്ളി നിര്മാണത്തിന് അനുവാദം നേടിയെടുക്കാന് നടത്തുന്ന നീക്കം യഥാര്ത്ഥ മതേതരജനാധിപത്യവിശ്വാസികള് ചെറുക്കുമെന്നും വി.മുരളീധരന് പറഞ്ഞു.
ഹിന്ദുഐക്യവേദി പ്രസിഡന്റ് ശശിധരന്പിള്ള അധ്യക്ഷനായിരുന്നു. തെക്കേക്കാവ് മോഹന്, വാളത്തുംഗല് അശോകന്, രമേശ്ബാബു, തെക്കടം പ്രവീണ്, കൊച്ചുനാരായണന്, ചിറ്റയം ഗോപകുമാര്, രാജു മുണ്ടക്കല്, പ്രസന്ന ഉണ്ണിക്കൃഷ്ണന്, ഓലയില് ഗോപന് എന്നിവര് സംസാരിച്ചു.
