ന്യൂദൽഹി : ശ്രീ നാരായണ ധർമ്മ പരിപാലന യോഗം ദൽഹി യൂണിയന്റെ ആഭിമുഖ്യത്തിൽ ഗുരു ജയന്തി ആഘോഷങ്ങൾ സെപ്റ്റംബർ 16 വെള്ളിയാഴ്ച രാവിലെ 4:30-ന് രോഹിണി ഗുപ്ത കോളനിയിലെ ഗുരുദേവ ക്ഷേത്രത്തിൽ മഹാ ഗണപതി ഹോമത്തോടെ ആരംഭിക്കും. അഞ്ച് മണിക്ക് ശാന്തി ഹവനം, 6:15-ന് വിശേഷാൽ ഗുരു പൂജ, 7-ന് ശ്രീ ശാരദാ മഠത്തിൽ പ്രത്യേക പൂജകൾ എന്നിവയും ഉണ്ടാവും.
ഗുരുദേവന്റെ ജനന സമയമായ രാവിലെ 6:15-ന് ക്ഷേത്ര സമുച്ചയത്തിൽ 162 നിലവിളക്കുകൾ തെളിയിക്കും. അതേ സമയത്ത് ഗുരുദേവ ഭക്ത ജനങ്ങൾ അവരവരുടെ ഭവനങ്ങളിലും 162 മൺചെരാതുകൾ തെളിയിച്ചു കൊണ്ട് ഗുരുദേവന്റെ ജയന്തി ആഘോഷങ്ങളിൽ പങ്കാളികളാകും. രാവിലെ എട്ട് മണിക്ക് യൂണിയൻ ഓഫീസ് സമുച്ചയത്തിൽ ജയന്തി ദിന പതാക പ്രസിഡണ്ട് ടി.പി. മണിയപ്പൻ ഉയർത്തും. തുടർന്ന് സെക്രട്ടറി കല്ലറ മനോജ് ജ്യോതി തെളിയിക്കൽ ചടങ്ങ് നടത്തും. കെ. എൻ.ഷാജിലാൽ ശാന്തിയുടെ നേതൃത്വത്തിൽ ഗുരുദേവ ഭാഗവത പാരായണവും സ്വാമിനി ശബരി ചേതന (ഗുരു ധാമം, കാഞ്ഞിരമറ്റം, എറണാകുളം) സ്വാമി നാരായണ ഋഷി (രോഹിണി ഗുരുദേവ ക്ഷേത്രം) തുടങ്ങിയവർ ജയന്തി സന്ദേശ പ്രവചനവും നടത്തും. അതിനുശേഷം സർവൈശ്വര്യ പൂജയോടെ നട അടക്കും. തുടർന്ന് അന്നദാനം.
വൈകുന്നേരം മഹാദീപാരാധനക്കു ശേഷം ബോർഡ് മെമ്പർ എം.കെ.അനിൽ കുമാർ ഗുപ്ത കോളനിയിലെ 162 വിദ്യാർത്ഥികൾക്ക് നൽകുന്ന വിദ്യാഭ്യാസ സഹായ നിധിയുടെ ഉദ്ഘാടനം നിർവഹിക്കും. രോഹിണി ശാഖയുടെ നേതൃത്വത്തിൽ നടക്കുന്ന സാംസ്കാരിക സമ്മേളനത്തിലും കലാപരിപാടികളിലും ജയന്തി സദ്യയിലും സാമൂഹിക സാംസ്കാരിക രംഗത്തെ പ്രമുഖർ പങ്കെടുക്കുമെന്ന് ഭാരവാഹികൾ അറിയിച്ചു.
