റോം: ഭൂകമ്പത്തിന്റെ അവശിഷ്ടങ്ങള്ക്കിടയില് 17 മണിക്കൂര് കുടുങ്ങിക്കിടന്ന പത്തുവയസ്സുകാരിക്ക് വിശ്വാസമായില്ല, അവള് രക്ഷപ്പെട്ടുവെന്ന്. കുട്ടിയെ കിട്ടിയ ശേഷവും രക്ഷാപ്രവര്ത്തകര്ക്ക് വിശ്വാസമായില്ല, അസാധ്യമായെന്ന്. ഒടുവില് എല്ലാവര്ക്കും ഹാവൂ എന്നൊരു ആശ്വാസം. ഇറ്റലിയില് 247 പേര്ക്ക് ജീവന് നഷ്ടപ്പെട്ടു. അവരില് ഒരാളാകാതെ ഗുലിയ രക്ഷപ്പെടുകയായിരുന്നു.
ദീര്ഘ നേരത്തെ പ്രയത്നത്തിനു ശേഷം കുട്ടിയുടെ അടുത്തെത്തിയ രക്ഷാ പ്രവര്ത്തകന് വിളിച്ചു പറഞ്ഞു, അവള് ജീവനോടെയുണ്ട്്. അവശിഷ്ടങ്ങള് വീണു പാതി ശരീരം മൂടിയ നിലയിലായിരുന്നു ഗുലിയ. അവളെ പുറത്തെടുക്കുമ്പോള് രക്ഷാ പ്രവര്ത്തകന് പറയുന്നതു കേള്ക്കാമായിരുന്നു, തല തട്ടാതെ സൂക്ഷിക്കണേ എന്ന്. വ്യാഴാഴ്ച പുലര്ച്ചെ മൂന്നരമണിക്കായിരുന്നു റിക്ടര് സ്കെയിലില് 6.2 രേഖപ്പെടുത്തിയ ഭൂചലനം.
