പള്ളുരുത്തി: തോപ്പുംപടിയിലെ സീഫുഡ് കമ്പനിയില് ജോലിക്കെത്തിയ പ്രായപൂര്ത്തിയായില്ലെന്ന് സംശയിക്കുന്ന 43പേരില് 23 പേരുടെ പ്രായം നിശ്ചയിക്കുന്ന പരിശോധന എറണാകുളം ജനറല് ആശുപത്രിയില് പൂര്ത്തിയായി. രണ്ട് ദിവസമായി ജനറല് ആശുപത്രിയില് നടക്കുന്ന വൈദ്യപരിശോധനയില് മുഴുവന് കുട്ടികളെയും എത്തിച്ചിരുന്നു. ആദ്യഘട്ടത്തില് പള്ളുരുത്തി പ്രത്യാശഭവനില് താമസിപ്പിച്ചിട്ടുള്ള 23 പേരുടെ പരിശോധനയാണ് പൂര്ത്തിയായത്. പ്രായപരിധി കഴിഞ്ഞിട്ടുള്ള 23 പേരെയും ഇന്ന് ഒറീഷയിലേക്ക് തിരിച്ചയക്കുമെന്ന് സൂചനയുണ്ട്. ഇതില് രണ്ടു കാരണങ്ങളാണ് പോലീസ് പറയുന്നത്. നിലവില് ജോലിചെയ്തിരുന്ന സ്ഥാപനത്തിലേക്ക് തിരികെ പ്രവേശിപ്പിക്കുവാന് കമ്പനി അധികൃതര് തയ്യാറാകില്ലെന്ന് അറിയിച്ചു. ഇപ്പോള് താമസിപ്പിച്ചുവരുന്ന താല്ക്കാലിക സംവിധാനത്തില് തുടരുന്നതിനും പോലീസ് ബുദ്ധിമുട്ട് അറിയിച്ചിട്ടുണ്ട്. ഈ സാഹചര്യത്തിലാണ് കുട്ടികളെ നാട്ടിലേക്കുതന്നെ മാറ്റുന്നതിന് ഒറീഷ പോലീസ് തീരുമാനിച്ചതെന്നറിയുന്നു.
കാക്കനാട് ചില്ഡ്രന്സ് ഹോമില് താമസിപ്പിച്ചിട്ടുള്ള ഇരുപതുപേരുടെ പരിശോധന രണ്ടുദിവസത്തിനുള്ളിലേ പൂര്ത്തിയാകൂവെന്ന് അധികൃതര് അറിയിച്ചു. പോലീസിന്റെ നേതൃത്വത്തില് പരിശോധനാഫലം കൈപ്പറ്റാമെന്ന ധാരണയിലാണ് കുട്ടികളെ നാട്ടിലേക്കുതന്നെ അയക്കാന് തീരുമാനിച്ചത്. കുട്ടികളുടെ പ്രായം സംബന്ധിച്ചുളള പരിശോധന പൂര്ണമായും വന്നതിനുശേഷമേ കമ്പനിക്കെതിരെ കേസെടുക്കുന്ന കാര്യം പരിഗണിക്കുകയുള്ളൂ. നിലവില് കുട്ടികളെ ഇവിടെ എത്തിച്ച ആലപ്പുഴ സ്വദേശി വേണുഗോപാലിനെ പ്രതിയാക്കി പള്ളുരുത്തി പോലീസ് കേസ് രജിസ്റ്റര് ചെയ്തിട്ടുണ്ട്. കുട്ടികളുടെ പരിശോധനക്കും മറ്റുമായി ഒറീഷയില്നിന്നും എത്തിയ പോലീസ്സംഘം കൊച്ചിയില്തന്നെ ക്യാമ്പ്ചെയ്യുകയാണ്.
