മൊഗദീഷു: സൊമാലിയയിലെ ഗാല്ക്കിയോ നഗരത്തിലുണ്ടായ ഇരട്ട സ്ഫോടനത്തില് ഇരുപത് പേര് കൊല്ലപ്പെട്ടു. 30 പേര്ക്ക് പരിക്കേറ്റു. പ്രാദേശിക സമയം ഇന്ന് പുലര്ച്ച അഞ്ചു മണിയ്ക്കാണ് സ്ഫോടനം നടന്നത്.
സുരക്ഷാ സേനാംഗങ്ങളും സൊമാലിയന് പൗരന്മാരും ഉള്പ്പെടെ 13 പേരാണ് കൊല്ലപ്പതെന്നാണ് ആദ്യ റിപ്പോര്ട്ടുകള്. പിന്നീട് 20 മരണം സ്ഥിരീകരിക്കുകയായിരുന്നു. മരണസംഖ്യ ഇനിയം ഉയരാമെന്ന് ഗാല്ക്കിയോ ആശുപത്രിയിലെ ഡോക്ടര് അഹമ്മദ് സൂഗുള് പറഞ്ഞു.
പ്രാദേശിക സര്ക്കാര് ആസ്ഥാനത്തെ ലക്ഷ്യം വച്ച് ഗാല്ക്കിയോയില് ആദ്യം വാഹന സ്ഫോടനമാണ് നടന്നത്. തുടര്ന്ന് അടിയന്തിര സേവനങ്ങളുമായി സ്ഫോടന സ്ഥലത്തെത്തിയ വാഹനങ്ങളെ ലക്ഷ്യമാക്കിയാണ് രണ്ടാം സ്ഥോടനം നടന്നത്. ആദ്യം ട്രക്ക് ബോംബ് സ്ഫോടനവും പിന്നാലെ കാര് ബോംബ് സ്ഫോടനവുമാണ് നടന്നത്.
അല് ഷബാബ് എന്ന ഭീകര സംഘടന സ്ഫോടനത്തിന്റെ ഉത്തരവാദിത്വം ഏറ്റെടുത്തിട്ടുണ്ട്. അന്താരാഷ്ട്ര പിന്തുണയുള്ള മൊഗാദിഷു സര്ക്കാരിനെതിരെ പോരാടുന്ന ഭീകര സംഘടനയാണ് അല് ഷബാബ്. സൊമാലിയയില് പ്രവര്ത്തിക്കുന്ന യുഎന് സംഘം സ്ഫോടനത്തെ അപലപിച്ചു.
അടുത്ത വര്ഷം സൊമാലിയയില് തെരഞ്ഞെടുപ്പ് നടക്കാനിരിക്കെയാണ് ആക്രമണം. കഴിഞ്ഞ ദിവസങ്ങളില് അല് ഷബാബ് കമ്മാന്ഡറെ സൊമാലിയന് സുരക്ഷാ സൈന്യം പിടികൂടിയിരുന്നു.
