പയ്യന്നൂര്: ബിജെപിയുടെ പ്രവര്ത്തനങ്ങളെ ആശയപരമായി നേരിടാനാവാതെ സിപിഎം നേതൃത്വം അക്രമത്തിന്റെ മാര്ഗ്ഗം സ്വീകരിക്കുകയാണെന്ന് ബിജെപി സംസ്ഥാന ജനറല് സെക്രട്ടറി കെ.സുരേന്ദ്രന്.
ഭരണത്തിന്റെ തണലില് അക്രമം നടത്തുകയും പോലീസിനെ ഉപയോഗിച്ച് സംഘപരിവാര് പ്രവര്ത്തകരെ ഉപദ്രവിക്കുകയാണ്. കുപ്പായം അഴിച്ചു വെക്കാത്ത ചില പോലീസ് ഉദ്യോഗസ്ഥന്മാര് പ്രവര്ത്തകരെ ഇനിയും ഉപദ്രവിക്കാനാണ് ശ്രമമെങ്കില് നിയമപരമായി അവരെ നേരിടേണ്ടി വരും. പോലീസുകാരുടെ ശമ്പളം എകെജി സെന്ററില് നിന്നല്ല, മറിച്ച് സാധാരണക്കാരന്റെ നികുതിപ്പണം ഉപയോഗിച്ചാണെന്നോര്ക്കണം.
നിയമം എല്ലാവര്ക്കും ഒരുപോലെ ബാധകമാകണം. ആസൂത്രിതമായി ഒരു അക്രമം നടക്കുമ്പോള് പോലീസും ഫയര്ഫോഴ്സും നിഷ്ക്രിയരായി പ്രവര്ത്തിച്ചത് ആരുടെ നിര്ദ്ദേശ പ്രകാരമാണെന്ന് അന്വേഷിക്കണം.
പാര്ട്ടിയുടെ അടിത്തറയിളകുമ്പോള് കൊലപാതകങ്ങള് നടത്തി അണികളെ പിടിച്ചു നിര്ത്താന് സിപിഎം നടത്തുന്ന സ്ഥിരം പരിപാടിയാണിത്. ഇനി ഈ നീതി നിഷേധത്തിന് ബിജെപി വഴങ്ങിക്കൊടുക്കില്ല. രണ്ടാം ബര്ദ്ദോളിയെന്നറിയപ്പെടുന്ന, സ്വാതന്ത്ര്യ സമര പ്രസ്ഥാനങ്ങളുടെ ശക്തമായ വേരോട്ടമുള്ള പയ്യന്നൂരില് സംഘടന സ്വാതന്ത്ര്യം നിഷേധിക്കാനാണ് സിപിഎം പോലീസ് കൂട്ടുകെട്ടിന്റെ ശ്രമമെങ്കില് ശക്തമായ ജനകീയ പ്രക്ഷോഭങ്ങളിലൂടെ അതിനെ നേരിടുമെന്നും അദ്ദേഹം പറഞ്ഞു.
