ബംഗളൂരു: ഭാരതത്തിന്റെ സാംസ്കാരിക പാരമ്പര്യം തലമുറകള് കടന്ന് പകര്ന്നു നല്കിയത് ഇതിഹാസമായ രാമായണമാണെന്ന് കെ.ആര്.പുരം ഭാരതമാതാശ്രമമഠാധിപതി പൂജനീയ സാധു പ്രൊഫ.രംഗരാജ സ്വാമികള് ഓര്മ്മിപ്പിച്ചു. ലോകത്തിലെ പൗരാണികമായ ഏതുകൃതികളിലും രാമായണത്തിന്റെ സ്വാധീനം പ്രകടമാണെന്ന് അദ്ദേഹം പറഞ്ഞു. ശ്രീരാമന് അവതാരമൂര്ത്തി എന്നതിലുപരി ഒരു മനുഷ്യനായി ജനിച്ച് എങ്ങനെയാണ് നാട് ഭരിക്കേണ്ടതെന്ന് ഭഗവാന് കാണിച്ചുതരികയുണ്ടായി. ഭാരതീയ കുടുംബ സങ്കല്പത്തില് രാമായണ കഥകള് വളരെ പ്രസക്തമാണ്. ആനുകാലിക സംഭവങ്ങള് കുടുംബ ബന്ധങ്ങളെ ശിഥിലമാക്കിക്കൊണ്ടിരിക്കുന്ന സാഹചര്യത്തില് ഭാരതീയ ജീവിത രീതിയെ പരിപോഷിപ്പിക്കണമെന്നും അദ്ദേഹം പറഞ്ഞു. സമന്വയ രാമമൂര്ത്തി നഗര് സ്ഥാനീയസമിതിയുടെ നേതൃത്വത്തില് കര്ക്കിടകം 1 മുതല് നടത്തിവരുന്ന രാമായണ പാരായണത്തിന്റെ സമാപനത്തോടനുബന്ധിച്ച് വിജനപുര അയ്യപ്പക്ഷേത്രത്തില് നടന്ന ചടങ്ങില് മുഖ്യപ്രഭാഷണം നടത്തുകയായിരുന്നു അദ്ദേഹം. മോഹനന് നാരായണന്റെ നേതൃത്വത്തില് സമ്പൂര്ണ്ണ രാമായണ പാരായണ യജ്ഞം നടത്തി. പാരായണം നടത്തിയ മോഹനന് നാരായണന്, ഗോപാലകൃഷ്ണന്, വത്സല, രാജലക്ഷ്മി, അമ്മിണി, തങ്കമണി, സുമതി, പ്രേമ, ബിന്ദു, വിജയലക്ഷ്മി, ഇന്ദിര, അയ്യപ്പന്നായര്, ക്ഷേത്രം പ്രസിഡണ്ട് എം.സി.അയ്യപ്പന് എന്നിവരെ പരിപാടിയില് ആദരിച്ചു. സ്ഥാനീയ സമിതി പ്രസഡണ്ട് സതീശ്കുമാര്, സെക്രട്ടറി അഭിലാഷ്.ജ, ട്രഷറര് പ്രനീഷ്, ഗണേശ്, സുനില് കുമാര് എന്നിവര് പരിപാടിക്ക് നേതൃത്വം കൊടുത്തു.
രാമായണം ഭാരത സംസ്കാരത്തിന്റെ സാംസ്കാരിക പൈതൃകം തലമുറകളിലേക്ക് പകര്ന്ന ഗ്രന്ഥം
ബന്ധപ്പെട്ട വാര്ത്തകള്
പുതിയ വാര്ത്തകള്
ജന്മഭൂമി ഓണ്ലൈന്© Mathruka Pracharanalayam Limited.
Tech-enabled by Ananthapuri Technologies.