ആലപ്പുഴ: തുറവൂര് വളമംഗലം എസ്എന്ജിഎം എജ്യുക്കേഷണല് കള്ച്ചറല് ട്രസ്റ്റിനു കീഴിലുള്ള സിബിഎസ്ഇ സ്കൂളിലും എഞ്ചിനീയറിങ്, ആര്ട്സ് കോളേജിലും ജോലി ചെയ്യുന്ന 135 അദ്ധ്യാപക അനദ്ധ്യാപക ജീവനക്കാരെ പിരിച്ചുവിട്ട നടപടി പിന്വലിക്കണമെന്നും ജീവനക്കാരെ ജോലിയില് പ്രവേശിപ്പിച്ച് ശമ്പളവും മറ്റാനുകൂല്യങ്ങളും നല്കണമെന്നും ബിഎംഎസ് ജില്ലാ പ്രസിഡന്റ് ബി. രാജശേഖരന് പത്രസമ്മേളനത്തില് ആവശ്യപ്പെട്ടു.
കഴിഞ്ഞ ജൂണ് ഒന്നുമുതലാണ് നോട്ടീസുപോലും നല്കാതെ ചെയര്മാന് പി. സനകന് ഇത്രയും ജീവനക്കാരെ പിരിച്ചുവിട്ടത്. ഇതിനെതിരെ ബിഎംഎസിന്റെ നേതൃത്വത്തില് ജീവനക്കാര് സമര രംഗത്താണ്. ജില്ലാ കളക്ടററുടെയും ജില്ലാ ലേബര് ഓഫീസറുടെയും സാന്നിദ്ധ്യത്തില് നടത്തിയ ചര്ച്ചകളില്പ്പോലും മാനേജ്മെന്റ് പങ്കെടുക്കാന് തയ്യാറായില്ല. സമരം ചെയ്യുന്ന വനിതാ ജീവനക്കാരെ ഉ ള്പ്പെടെ ഗുണ്ടകളെ ഉപയോഗിച്ച് ഭീഷണിപ്പെടുത്തുകയാണ്.
മൂന്നു മുതല് എട്ടുലക്ഷം രൂപവരെ ഡെപ്പോസിറ്റ് നല്കി ജോലിയില് പ്രവേശിച്ച ജീവനക്കാര് ഏഴായിരം ,എണ്ണായിരം രൂപ മാത്രമാണ് ശമ്പളമായി നല്കുന്നത്. ന്യായമായ വേതനം ആവശ്യപ്പെട്ടതിന് പ്രതികാരമായാണ് ഇത്രയും ജീവനക്കാരെ പിരിച്ചുവിട്ടത്. അന്യായമായ നടപടി റദ്ദാക്കുന്നതുവരെ ബിഎംഎസ് സമര രംഗത്തുണ്ടാവുമെന്നും തൊഴിലവകാശവും മനുഷ്യാവകാശവും ഉറപ്പാക്കാന് സര്ക്കാരും ബന്ധപ്പെട്ട അധികാരികളും ഇടപെടണമെന്നും അദ്ദേഹം ആവശ്യപ്പെട്ടു.
ബിഎംഎസ് ജില്ലാ ട്രഷറര് ബിനീഷ് ബോയ്, എസ്എന്ജിഎം സ്കൂള് ജീവനക്കാരായ ഉമാദേവി, എന്. മിനിമോള് എന്നിവര് പത്രസമ്മേളനത്തില് പങ്കെടുത്തു.
