മസ്തിഷ്ക വൈകല്യം ബാധിച്ചവരുടെ
കോഴിക്കോട്: ഓട്ടിസം, മാനസിക വൈകല്യം, സെറിബ്രല് പാള്സി തുടങ്ങിയ മസ്തിഷ്ക വൈകല്യങ്ങള് ബാധിച്ച കുട്ടികളുടെ അവകാശ സംരക്ഷണത്തിനായി ജില്ലയില് ഡിസെബിലിറ്റി അഡ്വക്കസി ഫോറം രൂപീകരിക്കാന് ഇതുമായി ബന്ധപ്പെട്ട് ജില്ലാകലക്ടറുടെ അദ്ധ്യക്ഷതയില് ചേര്ന്ന യോഗം തീരുമാനിച്ചു.
സമൂഹത്തിന്റെ പ്രത്യേക പരിഗണനയും പരിചരണവും ആവശ്യമായ ഈ കുട്ടികള്ക്കുള്ള അവകാശങ്ങളും ആനുകൂല്യങ്ങളും ലഭിക്കുന്നുവെന്ന് ഉറപ്പുവരുത്തുകയാണ് ഇതിലൂടെ ലക്ഷ്യമിടുന്നത്. ഇവരുമായി ബന്ധപ്പെട്ട കാര്യങ്ങള് കൈകാര്യം ചെയ്യുന്ന പ്രധാന വകുപ്പുകളായ സാമൂഹ്യനീതി, ആരോഗ്യം, വിദ്യാഭ്യാസം, തദ്ദേശ സ്വയംഭരണ സ്ഥാപനങ്ങള് എന്നിവയുടെ പ്രവര്ത്തനങ്ങള് ഇതുവഴി ഏകോപിപ്പിക്കും. ജില്ലാ ഭരണകൂടത്തിന് കീഴിലുള്ള കംപാഷനേറ്റ് കോഴിക്കോടുമായി സഹകരിച്ചാണ് ഇത് നടപ്പാക്കുക. വൈകല്യമുള്ള കുട്ടികള്ക്ക് ലഭിക്കേണ്ട അവകാശങ്ങളെയും ആനുകൂല്യങ്ങളെയും കുറിച്ച് രക്ഷിതാക്കളും ഉദ്യോഗസ്ഥരും ഉള്പ്പെടെയുള്ള സമൂഹത്തിന് കൃത്യമായ വിവരങ്ങള് ലഭ്യമല്ലെന്ന് യോഗം വിലയിരുത്തി. ഇതുമായി ബന്ധപ്പെട്ട് നിലവിലുള്ള കേന്ദ്രസംസ്ഥാന നിയമങ്ങള്, ഉത്തരവുകള്, സര്ക്കുലറുകള് എന്നിവയെക്കുറിച്ചും വിവിധ ഏജന്സികള് നല്കുന്ന ആനുകൂല്യങ്ങളെക്കുറിച്ചുമുള്ള വിവരങ്ങള് ക്രോഡീകരിച്ച് ജില്ലാ ഭരണകൂടത്തിന്റെ വെബ്സൈറ്റില് ലഭ്യമാക്കും. ഇതുമായി ബന്ധപ്പെട്ട ഏതന്വേഷണങ്ങള്ക്കുമുള്ള വിവരങ്ങള് നല്കുന്നതിനായി സ്റ്റേറ്റ് ഇനീഷ്യേറ്റീവ് ഓണ് ഡിസെബിലിറ്റി വിഭാഗത്തിനു കീഴില് കോള് സെന്റര് പ്രവര്ത്തനം തുടങ്ങും. അവകാശ ലംഘനങ്ങളുമായി ബന്ധപ്പെട്ട പരാതികള് കൈകാര്യം ചെയ്യുന്നതിനും കോഴിക്കോട്ട് സംവിധാനമൊരുക്കും. ഇതോടൊപ്പം കാലിക്കറ്റ് യൂനിവേഴ്സിറ്റിയിലെ സി.ഡി.എം. ആര്.പി, ഇംഹാന്സ്, സി. ആര്.സി എന്നിവയെ ഉപയോഗപ്പെടുത്തി വ്യാപകമായ ബോധവല്ക്കരണ പരിപാടികള് സംഘടിപ്പിക്കാനും യോഗം തീരുമാനിച്ചു.
മസ്തിഷ്ക വൈകല്യം ബാധിച്ചവരുടെ രക്ഷിതാക്കള്ക്ക് പ്രത്യേക പ്രിവിലേജ് കാര്ഡ് നല്കും. ആശുപത്രി ഉള്പ്പെടെയുള്ള സ്ഥലങ്ങളില് ഇവര്ക്ക് പ്രത്യേക പരിഗണന ലഭ്യമാക്കുന്നതിന് വേണ്ടിയാണിത്. മസ്തിഷ്ക വൈകല്യം ചെറുപ്രായത്തില് തന്നെ കണ്ടുപിടിക്കുന്നതിനാവശ്യമായ ബോധവല്ക്കരണവും പരിശീലനവും രക്ഷിതാക്കള്ക്കു നല്കും.
യോഗത്തില് സി. ആര്.സി റീജ്യനല് ഡയരക്ടര് ഡോ. റോഷന് ബിജ്ലി, സാമൂഹ്യസുരക്ഷാ മിഷന് റീജ്യണല് ഡയരക്ടര് ടി.കെ യൂനുസ്, ഡി.എം.ഒ ഡോ. ആര്. എല് സരിത, സാമൂഹ്യനീതി ഓഫീസര് ടി.പി സാറാമ്മ, മാധ്യമപ്രവര്ത്തകന് മഹേഷ് ഗുപ്തന്, കാലിക്കറ്റ് യൂനിവേഴ്സിറ്റി സി.ഡി. എം.ആര്.പി ജോയിന്റ് ഡയരക്ടര് റഹീമുദ്ദീന്, വകുപ്പുദ്യോഗസ്ഥര്, രക്ഷിതാക്കള് തുടങ്ങിയവര് സംബന്ധിച്ചു. ഈ പദ്ധതിയുമായി സഹകരിക്കാന് താല്പര്യമുള്ള വ്യക്തികളും സംഘടനകളും സ്ഥാപനങ്ങളും കരുണാര്ദ്രം കോഴിക്കോട് പദ്ധതിയുമായി 9847736000 എന്ന നമ്പറിലോ ുൃീഷലരരേലഹഹരഹ േ@ഴാമശഹ.രീാ എന്ന ഇമെയിലോ ബന്ധപ്പെടണം.
