കായംകുളം: ഭാഷാടിസ്ഥാനത്തില് കേരളം സംസ്ഥാനം രൂപം കൊണ്ടിട്ട് അറുപത് വര്ഷം പൂര്ത്തിയായിട്ടും ഔദ്യോഗിക ഭാഷ മലയാളമാക്കുന്നതില് നമ്മുടെ ഭരണാധികാരികള് പരാജയപ്പെട്ടതായി സാംസ്കാരിക പ്രവര്ത്തനും പ്രത്രാധിപരുമായ ചുനക്കര ജനാര്ദ്ദനന് നായര് അഭിപ്രായപ്പെട്ടു. സംസാരിക്കുന്നവരുടെ എണ്ണമല്ല ഭാഷയുടെ ശ്രേഷ്ഠത നിശ്ചയിക്കുന്നതെന്നും അദ്ദേഹം പറഞ്ഞു. ഭാരതീയവിചാരകേന്ദ്രം ജില്ലാസമിതിയുടെ ആഭിമുഖ്യത്തില് ജമീലബീവി മെമ്മോറിയല് ബിഎഡ് സെന്ററില് നടന്ന ചിങ്ങം ഒന്ന് മലയാള ഭാഷാദിനം”പരിപാടി ഉദ്ഘാടനം ചെയ്യുകയായിരുന്നു അദ്ദേഹം.
ഏത് ഭാഷയും സ്വീകരിക്കാന് മടിയില്ലാത്തവരാണ് മലയാളികള് പക്ഷെ മുലപ്പാലിന്റെ മാധുര്യംപോലെയാണ് മാതൃഭാഷയുടെ സൗന്ദര്യമെന്ന് നാം മറന്നുപോയിരിക്കുന്നു. ഭാഷയുടെ ചൈതന്യം വീണ്ടെടുക്കേണ്ടത് സംസ്കൃതിയുടെ നിലനില്പ്പിന്റെ കാര്യമാണ് അദ്ദേഹം കൂട്ടിച്ചേര്ത്തു.
ചടങ്ങില് ബിഎഡ് സെന്റര് പ്രിന്സിപ്പാള് ജ്യോതിരാജ് അദ്ധ്യക്ഷത വഹിച്ചു. വിചാരകേന്ദ്രം സംസ്ഥാനസമിതിയംഗം ഹരികുമാര് ഇളയിടത്ത് സ്വാഗതം പറഞ്ഞു. ഒപ്പുമരം – മലയാളത്തില് കൈയ്യൊപ്പ് ചാര്ത്തല് ചടങ്ങ് മാവേലിക്കര എ.ആര്. സ്മാരകസമതി സെക്രട്ടറി അനി വര്ഗ്ഗീസ് നിര്വ്വഹിച്ചു. കാവാലത്തിന് ഒരു കാവ്യാജ്ഞലി കാവാലം കവിതകളുടെ അവതരണം ഹര്ഷ നിര്വ്വഹിച്ചു. വിചാരകേന്ദ്രം ജില്ലാസെക്രട്ടറി ജെ. മഹാദേവന് ഭാഷാദിനസന്ദേശം നല്കി. ആര്. ഭാനുകൃഷ്ണന്, പി.എസ്. സുരേഷ്, ശാലിനി എന്നിവര് സംസാരിച്ചു.
