മുണ്ടക്കയം: കഞ്ചാവു വില്പ്പനയുടെ പേരില് കോളനി നിവാസികളെ എക്സൈസ് സംഘം പീഡിപ്പിക്കുന്നതായി കോളനി നിവാസികള് വാര്ത്താ സമ്മേളനത്തില് കുറ്റപെടുത്തി.
എരുമേലിയില് നിന്നെത്തിയ എക്സൈസ് അധികാരികളാണന്നു പറഞ്ഞു യാതൊരു കാരണവുമില്ലാതെ കോളനിയിലെ ചില വീടുകളില് ഇരച്ചു കയറിയ ഒരു വിഭാഗം ആളുകളെ ഭീഷണിപെടുത്തുകയും വീട്ടുപകരണങ്ങള് വലിച്ചിഴച്ചു നശിപ്പിച്ചതായും ഇവര് പറഞ്ഞു. കോളനി കേന്ദ്രീകരിച്ചു കഞ്ചാവു കച്ചവടം നടക്കുന്നത് മുമ്പ് നിരവധി തവണ കോളനിനിവാസികള് എക്സൈസിനേയും പോലീസിനേയും അറിയിച്ചിട്ടുണ്ട്. ഇത് സംബന്ധിച്ചു വിവരം നല്കിയതിന്റെ പേരില് കോളനി നിവാസികളെ സാമൂഹ്യ വിരുദ്ധര് അക്രമിക്കുകയുണ്ടായി. അധികാരികള്ക്കു നല്കുന്ന രഹസ്യവിവരം കച്ചവടക്കാരെ അറിയിക്കുന്നതാണ് ഈ സംഘര്ഷങ്ങള്ക്കെല്ലാം ഇടയാക്കുന്നത്. ഇത്തരം ആളുകള് നല്കുന്ന വ്യാജ വിവരത്തിന്റെ അടിസ്ഥാനത്തിലാണ് വ്യാഴാഴ്ച റെയ്ഡ് എന്ന പേരില് കോളനിയിലെ സ്ത്രീകളടക്കമുളളവരുടെ വീടുകളില് എക്സൈസ് അഴിഞ്ഞാടിയത്.
വൃദ്ധയായ സ്ത്രീകളോടുപോലും മാന്യമായി പെരുമാറാന് തയ്യാറാകാതിരുന്ന സംഘം വീട് നിര്മ്മാണ ജോലികള്ക്കു പോലും തടസ്സമുണ്ടാക്കുകയായിരുന്നു. മാന്യമായി ജീവിക്കുന്ന പാവപെട്ടവരോട് അധിക്രമം കാട്ടിയ ഇവര് സ്ത്രീകള് മാത്രമായുളള വീട്ടില് റെയ്ഡ് നടത്തിയപ്പോള് വനിത ജീവനക്കാരുടെ സാന്നിദ്ധ്യം പോലുമില്ലാതെയായിരുന്നുവെന്നും ഇവര് പറഞ്ഞു. വാര്ത്താ സമ്മേളനത്തില് കെ.കെ.റഷീദ്, ,പി.ടി.ഷരീഫ്, ഷീന ആനകല്ലില്, ജോസ്, ശോഭന മാന്നങ്കേരി, മറിയംബീവി ഷരീഫ് എന്നിവര് പങ്കെടുത്തു.
