മട്ടാഞ്ചേരി: കൊച്ചിയിലെ ട്രെയിലര് സര്വ്വീസ് സ്തംഭനം നീങ്ങി. തുറമുഖ മന്ത്രിയുടെ സാന്നിധ്യത്തില് നടന്ന ചര്ച്ചയില് ട്രെയിലര് പാര്ക്കിങ്ങ് പ്രശ്നത്തിന് താല്ക്കാലിക പരിഹാരമായതോടെയാണ് ഉടമകള് സര്വ്വീസ് പുനഃരാരംഭിച്ചത്. ഇതോടെ വല്ലാര്പാടം ടെര്മിനലില് നിന്ന് കഴിഞ്ഞ രണ്ട് ദിവസംനീണ്ട ചരക്ക് നീക്ക സ്തംഭനത്തിന് പരിഹാരവുമായി.
വിവിധ സ്ഥലങ്ങളില് നിന്ന് വല്ലാര്പാടം ടെര്മിനലിലേയ്ക്ക് കയറ്റിറക്കുമതി കണ്ടെയ്നറുമായെത്തുന്ന ട്രെയിലറുകള് റോഡരികില് പാര്ക്ക് ചെയ്യുന്നതില് കടുത്ത ശിക്ഷ നടപടികള് കൈക്കൊള്ളുകയും സൗകര്യമൊരുക്കാതിരിക്കുകയും ചെയ്ത സാഹചര്യത്തിലാണ് കൊച്ചിന് കണ്ടെയ്നര് കാരിയര് ഓണേഴ്സ് വെല്ഫെയര് അസോസിയേഷന് ബുധനാഴ്ച മുതല് ട്രെയിലര് സര്വ്വീസ് നിര്ത്തിയത്. പ്രതിദിനം ശരാശരി 600-800 കണ്ടെയ്നറുകളുമായി സര്വ്വീസ് നടത്തുന്ന 2000 ത്തോളം ട്രെയിലറുകളാണ് വിശ്രമത്തിലായത്. കൊച്ചി തുറമുഖ ട്രസ്ററ് പാര്ക്കിങ്ങ് യാര്ഡ വിഷയത്തില് നിരുത്തരവാദ സമീപനമാണ് കൈക്കൊണ്ടതെന്ന് ട്രെയിലര് ഉടമകള് ചൂണ്ടിക്കാട്ടുന്നു. കണ്ടെയ്നര് നീക്കം നിലച്ചതോടെ കയറ്റിറക്കുമതി വ്യാപാര സമൂഹം’ സ്റ്റീമര് ഏജന്റസ് ക്ലീയറിങ്ങ് വിഭാഗം തുടങ്ങി വിവിധ മേഖലകളില് നിന്നും ആശങ്കകളുമുയര്ന്നിരുന്നു.
വെള്ളിയാഴ്ച കൊച്ചിയില് സംസ്ഥാന തുറമുഖ മന്ത്രി കടന്നപ്പള്ളി രാമചന്ദ്രന്റെ നേതൃത്തില് ബന്ധപ്പെട്ട മേഖല പ്രതിനിധികളുമായി നടന്ന ചര്ച്ചയിലാണ് പ്രശ്ന പരിഹാരം നടന്നത്. കണ്ടെയ്നറുമായെത്തുന്ന ട്രെയിലറുകള്ക്ക് വല്ലാര്പാടത്തെ ഡി.പി.വേള്ഡ് ടെര്മിനല് കോമ്പൗണ്ടിലും റോ-റോ ജെട്ടിക്ക് സമീപവും പാര്ക്കിങ്ങ് സൗകര്യമൊരുക്കി. കൂടാതെ ബിപിസിഎല്ലിന്റെ അഞ്ച് ഏക്കര് ട്രെയിലര് പാര്ക്കിങ്ങ് യാര്ഡ് സെപ്തംബറില് തയ്യാറാക്കുന്നതിനും തീരുമാനമായി. പാര്ക്കിങ്ങിന്റെ പേരിലുള്ള ട്രെയിലര് പിടിച്ചെടുത്ത ശിക്ഷണ നടപടികള് എത്രയും വേഗം പുര്ത്തിയാക്കും. കൊച്ചിയിലെ പ്രത്യേക സാമ്പത്തിക മേഖലയ്ക്ക് പുറമേയുള്ള സ്ഥലത്ത് പത്ത് ഏക്കര് സ്ഥലത്ത് മറ്റൊരു പാര്ക്കിങ്ങ് യാര്ഡ് ഒരുക്കുവാനും ധാരണയായി. ചര്ച്ചയില് എംഎല്എമാരായ എസ്.ശര്മ്മ ,കെ.ജെ. മാക്സി, ദുബായ് പോര്ട്ട് സി.ഇ.ഓ കൃഷ്ണദാസ്, കൊച്ചിന് പോര്ട്ട് ട്രാഫിക്ക് മാനേജര് ബിശ്വാസ് , ഗിരിജ ജില്ലാ കളക്ടര് എം.ജി.രാജമാണിക്യം, പോലീസ് അധികൃതര്. ഉടമ സംഘടനാ ഭാരവാഹികളായ കെ.ടി.സജീവ്, ടോമി തോമസ്സ്, നാരായണന് തുടങ്ങിയവര് പങ്കെടുത്തു.
