പാലാ: ഈരാറ്റുപേട്ട ഹൈവേയില് കൊച്ചിടപ്പാടി ഭാഗത്ത് അപകടകരമായ രീതിയില് അനധികൃതമായി തടികള് ലോറിയില് ഇറക്കി കയറ്റുന്നത് അപകടഭീഷണി ഉയര്ത്തുന്നതായി പരാതി.
ഹൈവേ പൂര്ത്തീകരിച്ചപ്പോള് കവീക്കുന്നിനുള്ള പ്രവേശനകവാടത്തുങ്കല് പഴയറോഡിന്റെ ഇരുവശവുമാണ് തടികള് ഇറക്കി കയറ്റുന്ന താവളമായി മാറ്റിയിരിക്കുന്നത്. ഈരാറ്റുപേട്ട, തലനാട് അടക്കമുള്ള പ്രദേശത്തുള്ള തടിവ്യാപാരികള് വിവിധ സ്ഥലങ്ങളില്നിന്നുമുള്ള തടികള് ചെറുവണ്ടികളില് കൊണ്ടുവന്ന് ഇവിടെ തള്ളുകയാണ് പതിവ്. ഇങ്ങനെ തള്ളുന്ന തടികഷ്ണങ്ങള് പിന്നീട് ദിവസങ്ങള് കഴിഞ്ഞാണ് സുരക്ഷാസജ്ജീകരണങ്ങളൊന്നുമില്ലാതെ ലോറികളില് നിറച്ച് മില്ലുകളിലേക്ക് മാറ്റുന്നത്. റോഡിലേക്ക് തടികള് തള്ളി ഇടുന്നതുമൂലം റോഡിനും കേടുപാടുകള് ഉണ്ടാകും. ഒപ്പം തടികള് കയറ്റുമ്പോള് അപകടമുണ്ടാവുവാനുള്ള സാധ്യതയും ഏറെയാണ്. നിരന്തരം വാഹനങ്ങള് കടന്നു പോകുന്ന ഈ റൂട്ടില് സ്കൂള് കുട്ടികളടക്കമുള്ള നിരവധി കാല്നടക്കാരും സഞ്ചരിക്കുന്നുണ്ട്. ഇവര്ക്കും ഈ കയറ്റിയിറക്ക് ഭീഷണിയാണ്. തടികള് കയറ്റിയിറക്കുമ്പോള് ഭീതിയോടെയാണ് ആളുകള് ഇതുവഴി സഞ്ചരിക്കുന്നത്.
അടിയന്തിരമായി ഇതിനെതിരെ നടപടിയെടുക്കണമെന്ന് പോലീസ്-മോട്ടോര്വാഹന-പൊതുമരാമത്ത് വകുപ്പ് അധികൃതരോട് കവീക്കുന്ന് വികസന സമിതി ആവശ്യപ്പെട്ടു. കണ്വീനര് എബി.ജെ. ജോസ് അദ്ധ്യക്ഷത വഹിച്ചു. കൗണ്സിലര് ടോണി തോട്ടം, ബേബി ആനപ്പാറ, സാജന് പുരയിടത്തില് തുടങ്ങിയവര് സംസാരിച്ചു.
