ഇസ്താംബൂള്: തുര്ക്കിയില് സൈനിക അട്ടിമറിയുടെ പശ്ചാത്തലത്തില്, മുന്പ് റദ്ദാക്കിയിരുന്ന വധശിക്ഷ പുനഃസ്ഥാപിച്ചേക്കും. 2004ല് യൂറോപ്യന് യൂണിയനില് അംഗത്വം നേടാനുള്ള ശ്രമത്തിന്റെ ഭാഗമായാണ് തുര്ക്കിയില് വധശിക്ഷ നിരോധിച്ചത്. കഴിഞ്ഞ ദിവസം സൈനിക അട്ടിമറിലൂടെ സൈന്യത്തിലെ ഒരു വിഭാഗം ഭരണം കൈയടക്കാന് ശ്രമിച്ചതിന്റെ പശ്ചാത്തലത്തിലാണ് വധശിക്ഷ പുനഃസ്ഥാപിക്കുന്നത് പരിഗണിക്കുന്നതെന്ന് പ്രസിഡന്റ് തയിബ് എര്ദോഗന് പറഞ്ഞു.
ജനാധിപത്യത്തില് ജനങ്ങള്ക്കാണ് പ്രാധാന്യമെന്നും രാജ്യദ്രോഹികളായവര്ക്കെതിരെ ജനങ്ങളുടെ അഭിപ്രായമനുസരിച്ച് വധശിക്ഷ പുനഃസ്ഥാപിക്കുന്ന കാര്യം പ്രതിപക്ഷവുമായി കൂടി ആലോചിച്ച് ഉടന് തീരുമാനിക്കുമെന്നും അദ്ദേഹം വ്യക്തമാക്കി. അട്ടിമറി ശ്രമത്തിനിടയില് കൊല്ലപ്പെട്ടവര്ക്ക് ആദരാഞ്ജലികളര്പ്പിച്ചുകൊണ്ടു നടന്ന ചടങ്ങില് സംസാരിക്കുകയായിരിന്നു അദ്ദേഹം. അട്ടിമറിക്കു ശ്രമിച്ച സൈനിക ഉദ്യോഗസ്ഥരും അനുയായികളുമടക്കം ആറായിരത്തിലേറെ പേരാണ് അറസ്റ്റിലായത്. കഴിഞ്ഞ ദിവസമുണ്ടായ സൈനിക അട്ടിമറി ചെറുക്കാനുള്ള ശ്രമത്തില് 294 പേര് മരിക്കുകയും ആയിരത്തി നാനൂറോളം പേര്ക്ക് പരിക്കേല്ക്കുകയും ചെയ്തിട്ടുണ്ട്. ജനങ്ങള് ഒന്നടങ്കം തെരുവിലിറങ്ങിയാണ് അട്ടിമറി ശ്രമം പൊളിച്ചത്.
