ന്യൂയോര്ക്ക്: പോക്കിമോന് ഗോ ഗെയിമിലെ കഥാപാത്രങ്ങളെ അനുകരിച്ച് കാറില് കറങ്ങി നടന്ന കൗമാരക്കാരെ കള്ളന്മാരെന്ന സംശയത്തില് സമീപവാസി വെടിവെച്ചു. എന്നാല് ഇവര് ഭാഗ്യത്തിനു പരിക്കേല്ക്കാതെ രക്ഷപ്പെട്ടു. അമേരിക്കയിലെ ഫ്ളോറിഡയിലാണ് സംഭവം. പത്തൊമ്പതും പതിനാറും വയസ്സുള്ളവരാണ് അപകടത്തിനിരയായത്.
‘നിനക്ക് എന്തെങ്കിലും കിട്ടിയോ’ എന്നു കൗമാരക്കാര് തമ്മില് പറഞ്ഞതാണ് വീട്ടുടമയെ സംശയത്തിലാക്കിയത്. ഇതോടെ ഇവര് കവര്ച്ചക്കാരാകാമെന്ന നിഗമനത്തിലെത്തിയ വീട്ടുടമ കാര് തടയാന് ശ്രമിക്കുകയും നിര്ത്താതെ പോയതോടെ വെടിയുതിര്ത്തു. എന്നാല് ബുള്ളറ്റ് ലക്ഷ്യം തെറ്റി കാറിന്റെ ടയറില് പതിച്ചതിനാല് കൗമാരക്കാര് രക്ഷപ്പെടുകയായിരുന്നു.
അതേസമയം സംഭവം വിവാദമായതോടെ അധികൃതര് രംഗത്തെത്തി. സുരക്ഷാ പ്രശ്നങ്ങളെ വിലയിരുത്തി ഗെയിം കളിക്കുമ്പോള് ശ്രദ്ധക്കേണ്ട കാര്യങ്ങളെക്കുറിച്ച് കുട്ടികള്ക്കിടയില് ബോധവത്കരണ പരിപാടി നടത്താനും അധികൃതര് തീരുമാനിച്ചു. സോഷ്യല് മീഡിയകളില് ചെലവിടുന്നതിനെക്കാള് അധികം സമയവും ഇപ്പോള് ഗെയിം കളിക്കാനാണ് കൗമാരക്കാര് ചെലവഴിക്കുന്നതെന്നാണ് റിപ്പോര്ട്ട്.
നിയന്റ്റിക് സോഫ്ട്വെയര് ഡെവലെപിങ് കമ്പനി നിര്മ്മിച്ച ഒരു മൊബൈല് ഗെയിം ആണ് പോകിമോന് ഗോ. ഓഗ്മെന്റഡ് റിയാലിറ്റി മാപ്പുമായി സംയോജിപ്പിച്ചാണ് ഗെയിം രൂപപ്പെടുത്തിയത്. സ്മാര്ട്ട് ഫോണിലെ ജിപിഎസ്, ക്ലോക്ക്, ക്യാമറ എന്നിവ കൂടി ഉപയോഗിച്ചാണ് കളിക്കുന്നവരുടെ പരിസരത്തെ പശ്ചാത്തലം ഗെയിമിന് ഉപയോഗപ്പെടുത്തുന്നത്. റോഡരികിലും സീബ്രാ ലൈനിലുമെല്ലാം പോകിമോന് കളിച്ചു കൊണ്ടു നടക്കുന്നവര് പരിസരം മറന്നുപോകാന് സാധ്യത ഏറെയാണെന്നത് ആശങ്കയുണ്ടാക്കുന്നു.
