തലശ്ശേരി: തലശ്ശേരി-വിരാജ് പേട്ട വരെയുള്ള റെയില്പ്പാതയുടെ ചെലവിന്റെ പകുതി തുക സംസ്ഥാന സര്ക്കാര് വഹിക്കാന് തയ്യാറാവുകയാണെങ്കില് തലശ്ശേരി-മൈസൂര് റെയില്വേ എന്ന ചിരകാല സ്വപ്നം യാഥാര്ത്ഥ്യമാകുമെന്ന് രാജ്യസഭാംഗം പ്രൊഫ.റിച്ചാര്ഡ് ഹേ എംപി പറഞ്ഞു.
തലശ്ശേരി പ്രസ്സ് ഫോറത്തില് ഇന്നലെ നടന്ന മുഖാമുഖം പരിപാടിയില് സംസാരിക്കുകയായിരുന്നു അദ്ദേഹം. വിരാജ്പേട്ട മുതല് മൈസൂര് വരെയുള്ള ചെലവിന്റെ പകുതി തുക കര്ണാടക സര്ക്കാര് വഹിക്കണം. അങ്ങിനെയാണെങ്കില് മൊത്തം ചെലവിന്റെ അമ്പതു ശതമാനം കേന്ദ്ര വഹിക്കാന് തയ്യാറാവുമെന്ന കാര്യത്തില് സംശയമില്ല. തലശ്ശേരി റെയില്വേ സ്റ്റേഷന്-പുതിയ ബസ് സ്റ്റാന്റ് റോഡിനാവശ്യമായ അനുമതി ലഭിച്ചുകഴിഞ്ഞിട്ടുണ്ടെന്നും ഇനി ഇത് യാഥാര്ത്ഥ്യമാകേണ്ടത് തലശ്ശേരി നഗരസഭയാണെന്നും അദ്ദേഹം പറഞ്ഞു.
മട്ടന്നൂര് വിമാനത്താവളം 4000 മീറ്ററാക്കുകയാണെങ്കില് ഇന്ത്യയിലെ മൂന്നാമത്തെ ഏറ്റവും വലിയ വിമാനത്താവളമായി കണ്ണൂര് മാറുമെന്നും അതുവഴി കാര്ഗോ ഇന്റര്നാഷണല് ലാന്റിങ്ങ് നടക്കുമെന്നും അദ്ദേഹം പറഞ്ഞു. തലായി-കൊമ്മല് വയല് റോഡ് യോജിപ്പിക്കാന് ആവശ്യമായ നടപടി സ്വീകരിക്കുവാന് ആവശ്യമായ നടപടി സ്വീകരിക്കുവാന് റെയില്വേയോട് ആവശ്യപ്പെട്ടിട്ടുണ്ട്. താല്പര്യമുള്ള ഏത് വിദ്യാലയത്തിലും സ്മാര്ട്ട് ക്ലാസ് റൂം ആരിഭിക്കാന് ആവശ്യമായ ഫണ്ട് അനുവദിക്കും. മലബാര് കാന്സര് സെന്ററില് ചികിത്സക്കെത്തുന്ന തൊഴിലാളികള്ക്ക് ഇഎസ്ഐ ആനുകൂല്യം ലഭ്യമാക്കാന് കേന്ദ്രസര്ക്കാര് പദ്ധതി തയ്യാറാക്കിയിട്ടുണ്ടെന്നും സംസ്ഥാന സര്ക്കാര് പകുതി തുക വഹിക്കാന് തയ്യാറാവുകയാണെങ്കില് തലശ്ശേരി കൊടുവള്ളി ഫ്ളൈ ഓവര് പണിയാന് കേന്ദ്രസര്ക്കാര് തയ്യാറാണെന്നും റിച്ചാര്ഡ് ഹേ പറഞ്ഞു. തലശ്ശേരി-മാഹി ബൈപ്പാസ് 45 മീറ്റര് വീതിയില് യാഥാര്ത്ഥ്യമാകാത്തതിന് കാരണം അഴിയൂരിലെ സ്ഥലമെടപ്പ് സംസ്ഥാന സര്ക്കാര് പൂര്ത്തിയാക്കാത്തതിനാലാണെന്നും മാഹിയിലെ പ്രശ്നം പുതുച്ചേരി ഗവര്ണറുമായി സംസാരിച്ച് ധാരണയിലെത്തിയിട്ടുണ്ടെന്നും അദ്ദേഹം പറഞ്ഞു. സംസ്ഥാന സര്ക്കാറും തദ്ദേശ സ്വയംഭരണ സ്ഥാപനങ്ങളും സഹകരിക്കുകയാണെങ്കില് പ്രധാനമന്ത്രി സഡക് യോജന പദ്ധതി പ്രകാരം അഞ്ചു വര്ഷ ഗ്യാരണ്ടിയോടെ മനോഹരമായ റോഡുകള് എവിടെ വേണമെങ്കിലും നിര്മ്മിക്കാന് കേന്ദ്രസര്ക്കാര് വഹിക്കുമെന്നും റിച്ചാര്ഡ് ഹേ എംപി അറിയിച്ചു. മുഖാമുഖം പരിപാടിയില് പ്രസ്സ് ഫോറം പ്രസിഡണ്ട് കെ.ജെ.ജോര്ജ്ജ് അധ്യക്ഷത വഹിച്ചു. സെക്രട്ടറി എന്.സിറാജുദ്ദീന് സ്വാഗതം പറഞ്ഞു.
