പിറവം: വിഷ്ണുമായക്കും വിവേകിനും പഠിക്കാനും അന്തിയുറങ്ങാന് വീടിനും നടപടികളാകുന്നു. കുന്നത്തുനാട് തഹസില്ദാര് തുളസീധരന്റെ നേതൃത്വത്തിലുള്ള റവന്യൂസംഘം ഇന്നലെ കുട്ടികളുടെ വീടും സ്ഥലവും സന്ദര്ശിച്ചു. സ്ഥലത്തിന് പട്ടയം ലഭിക്കുന്നതിനും വീട് പണിയുന്നതിനും പഠനകാര്യത്തിലും ഉടന് നടപടിയെടുക്കുമെന്ന് തഹസില്ദാര് അറിയിച്ചു. ഇവരുടെ ദുരിതം ചൂണ്ടിക്കാട്ടി ജന്മഭൂമി കഴിഞ്ഞ ദിവസം പ്രസിദ്ധീകരിച്ച വാര്ത്തയെ തുടര്ന്നാണ് നടപടി.
കുടുംബത്തെ സഹായിക്കാന് സംഘടനകളും സുമനസ്സുകളും മുന്നോട്ട് വരുന്നുണ്ട്. കുട്ടികളെ കാണുന്നതിനും സാഹചര്യങ്ങള് മനസിലാക്കാനും ഇന്നലെ രാവിലെ മുതല് വിവിധ ഭാഗങ്ങളില് നിന്നും രാഷ്ട്രീയ നേതാക്കളും സന്നദ്ധസംഘടനകളും എത്തിയിരുന്നു. തിരുവാണിയൂര് പഞ്ചായത്ത് പ്രസിഡന്റ് കെ.സി.പൗലോസ്, വാര്ഡ് മെമ്പര് എം.എം.പത്രോസ്, ബിജെപി ജില്ല ജനറല് സെക്രട്ടറി എം.എന്.മധു തുടങ്ങിയ നേതാക്കള് കുടുംബത്തെ സന്ദര്ശിച്ച് കുട്ടികള്ക്ക് പഠിക്കുന്നതിന് സഹായം വാഗ്ദാനം ചെയ്തു.
‘വിഷ്ണുമായക്കും വിവേകിനും പഠിക്കണം, അന്തിയുറങ്ങാന് വീടും വേണം’ എന്ന വാര്ത്ത ഇന്നലെയാണ് ജന്മഭൂമി പ്രസിദ്ധീകരിച്ചത്. തിരുവാണിയൂര് വെങ്കിട ഏഴാംവാര്ഡിലെ മണിയുടേയും ബിന്ദുവിന്റേയും മക്കളാണ് വിഷ്ണുമായയും വിവേകും. മണി ഏറെക്കാലം മുന്പ് കുടുംബത്തെ ഉപേക്ഷിച്ചു. ഒന്നര സെന്റ് പുറമ്പോക്കിലാണ് അടച്ചുറപ്പില്ലാത്ത ഒരു ഷെഡില് മണിയുടെ അച്ഛന് കുഞ്ഞപ്പനും(63) അമ്മ തങ്കമണിയും(59) കുട്ടികളും താമസിക്കുന്നത്. പഠനത്തില് മിടുക്കരെങ്കിലും പണമില്ലാത്തത് തടസ്സമാകുന്നു. ചോര്ന്ന് ഒലിക്കുന്ന അടച്ചുറപ്പില്ലാത്ത ഒറ്റമുറി വീട്ടില് പെണ്കുട്ടിയെ തനിച്ചാക്കി ജോലിക്ക് പോകാന് സാധിക്കാത്ത അവസ്ഥയിലാണ് അമ്മ. തങ്ങളുടെ ദുരിതങ്ങള്ക്ക് പരിഹാരമാകുമെന്ന പ്രതീക്ഷയിലാണ് കുടുംബം.
