മൈസൂരു: രാജകീയ വിവാഹ ആഘോഷത്തിന്റെ സുവര്ണപ്രഭയിലാണ് മൈസൂര് രാജകൊട്ടാരം. നീണ്ട ഇടവേളയ്ക്ക് ശേഷമാണ് ലോകപ്രസിദ്ധമായ അംബവിലാസ് കൊട്ടാരത്തില് രാജകീയ മംഗല്യം നടക്കുന്നത്. ഉന്നത രാഷ്ട്രീയ നേതൃത്വത്തിന്റെയും നയതന്ത്രപ്രതിനിധികളുടെയും സമൂഹത്തിലെ നാനാതുറയിലുള്ള വിശിഷ്ടവ്യക്തികളുടെയും സാന്നിദ്ധ്യത്തില് ഇന്നലെ രാവിലെ 9.05നും 9.35നും ഇടയിലുള്ള ശുഭമുഹൂര്ത്തത്തില് മൈസൂരു രാജാവ് യദുവീര് കൃഷ്ണദത്ത ചാമരാജ വോഡയാര് ത്രിഷികാ കുമാരിയുടെ കഴുത്തില് താലി ചാര്ത്തി.
രാജസ്ഥാനിലെ ദുംഗപൂര് രാജകുടുംബത്തിലെ ഹര്ഷവര്ദ്ധന് സിങ്ങിന്റെയും മഹേശ്വരി കുമാരിയുടെയും മകളാണ് ത്രിഷികാ. പാരമ്പരാഗതശൈലിയില് രാവിലെ ആറിന് വിവാഹ ചടങ്ങുകള് ആരംഭിച്ചു. കൊട്ടാരത്തിലെ എട്ടുക്ഷേത്രങ്ങളിലും ദര്ശനം നടത്തിയശേഷമാണ് വരന് കല്യാണമണ്ഡപത്തിലെത്തിയത്. മണ്ഡപത്തിലെത്തുന്ന യദുവീറിനെ ആരതിയുഴിഞ്ഞ് സ്വീകരിച്ചു. മുഹൂര്ത്തത്തിനുമുമ്പായി വധു ത്രിഷികാ കുമാരി ഗൗരീപൂജ നിര്വഹിച്ചു. രാജഗുരു ബ്രഹ്മതന്ത്ര പരകാലമഠത്തിലെ അഭിനവ വഗീഷ ബ്രഹ്മതന്ത്ര സ്വതന്ത്ര സ്വാമിയുടെ പാദപൂജ യദുവീര് നിര്വ്വഹിച്ചു.
കഴിഞ്ഞവര്ഷം മെയ് 28നായിരുന്നു പരമ്പരാഗത രീതിയില് യദുവീര് രാജാവായി കിരീടധാരണം നടത്തിയത്. ദസരാ കാലഘട്ടത്തില് സ്വര്ണ സിംഹാസനത്തില് ആരോഹിതനായി സഭയില് (കൊട്ടാരത്തിലെ സ്വകാര്യ ചടങ്ങാണിത്) പങ്കെടുത്തു.
മഹാറാണി പ്രമോദാദേവി പ്രത്യേകം രൂപകല്പനചെയ്ത കുര്ത്തയായിരുന്നു യദുവീറിന്റെ കല്യാണവേഷം. ബ്രിട്ടീഷ് രാജകുടുംബത്തില്നിന്ന് മൈസൂരു രാജകുടുംബം തിരികെപ്പിടിച്ച രത്നങ്ങള് പതിച്ച കിരീടമാണ് യദുവീര് അണിഞ്ഞത്. വിവാഹ സല്ക്കാരങ്ങള് 28നും ജൂലൈ രണ്ടിനുമായി മൈസൂരും ബെംഗളൂരുവിലുമായി നടക്കും.
അവസാന അനന്തരാവകാശി ശ്രീകണ്ഠദത്ത നരസിംഹരാജ വോഡയാര് – പ്രമോദാദേവി ദമ്പതികള്ക്ക് കുട്ടികളുണ്ടായിരുന്നില്ല. ഇതിനെത്തുടര്ന്ന് പ്രമോദാദേവി അനന്തരാവകാശിയെ ദത്തെടുക്കുകയായിരുന്നു. പിന്നീട് യദുവീര് കൃഷ്ണദത്ത ചാമരാജ വോഡയാര് എന്ന് പുനര്നാമകരണം ചെയ്തു.
വോഡയാര് രാജവംശത്തിലെ 27-ാമത്തെ രാജാവായ യദുവീര് അമേരിക്കയിലെ ബോസ്റ്റണ് സര്വകലാശാലയില് നിന്നും ധനതത്വശാസ്ത്രത്തിലും ഇംഗ്ലീഷിലും ബിരുദം നേടിയിരുന്നു. അവസാനത്തെ വോഡയാര് രാജാവായിരുന്ന മഹാരാജ ജയചാമരാജേന്ദ്ര വോഡയാറുടെ മൂത്തമകള് റാണി ഗായത്രീ ദേവിയുടെ പൗത്രനാണ് യദുവീര്. മൈസൂരിലെ വോഡയാര് രാജവംശം 1399മുതല് 1947 വരെ ഭരണം നടത്തിയിരുന്നു.
സമൂഹത്തിന് നിരവധി സേവനങ്ങള് വോഡയാര് രാജവംശം ചെയ്തിട്ടുണ്ട്. കാവേരിനദിയിലെ കെആര്എസ് ഡാം രാജഭരണകാലത്ത് നിര്മ്മിച്ചതാണ്. നിരവധി വ്യവസായ സ്ഥാപനങ്ങളും വിദ്യാഭ്യാസ സ്ഥാപനങ്ങളും രാജവംശത്തിന്റെ സംഭാവനകളായിട്ടുണ്ട്.
