എം.ഡി. ബാബുരഞ്ജിത്ത്
കരുനാഗപ്പള്ളി: സംസ്ഥാനത്തെ മുനിസിപ്പാലിറ്റികളില് ഏറെ പുരോഗതി പ്രാപിച്ചിട്ടുള്ള മുനിസിപ്പാലിറ്റികളിലൊന്നാണ് കരുനാഗപ്പള്ളിയെങ്കിലും അവിടുത്തെ അടിസ്ഥാനവികസന പ്രവര്ത്തനങ്ങളില് കാര്യമായ പുരോഗതി കൈവരിക്കാന് സാധിച്ചിട്ടില്ല.
മാലിന്യപ്രശ്നവും കുടിവെള്ള പ്രശ്നവും, ഡ്രയിനേജ് സംബന്ധമായ വിഷയങ്ങള് ഉള്പ്പടെ പരിഹരിക്കപ്പെടേണ്ട ധാരാളം വിഷയങ്ങള് ഉണ്ടെങ്കിലും ഏറെ പ്രാധാന്യം കല്പ്പിക്കേണ്ട ഒരു വിഷയമാണ് റോഡ് വികസനവുമായി ബന്ധപ്പെട്ടുള്ളത്. ഇവിടെ ഏറി വരുന്ന ഗതാഗതകുരുക്ക് കുറച്ചൊന്നുമല്ല ജനങ്ങളെ ബുദ്ധിമുട്ടിക്കുന്നത്. പുതിയകാവ് മുതല് കന്നേറ്റി വരെയുള്ള നാലു കിലോമീറ്ററോളം വരുന്ന പ്രദേശമാണ് വാഹന ങ്ങളുടെ ആധിക്യം ഏറെ അനുഭവപ്പെടുന്നത്. ഇവിടെയാണ് ആയിരക്കണക്കിനു കുട്ടികള് പഠിയ്ക്കുന്ന അഞ്ചോളം സ്കൂളുകള് നിലനില്കുന്നത്. കൂടാതെ കോടതികളും ഓഫീസ് സമുച്ചയങ്ങളുമുള്ള മിനി സിവില് സ്റ്റേഷന്, പോലീസ് സ്റ്റേഷന്, ട്രാന്സ്പോര്ട്ട് സ്റ്റാന്റ്, താലൂക്ക് ഹെഡ്ക്വാര്ട്ടേഴ്സ് ഉള്പ്പെടെ നാലോളം ഹോസ്പിറ്റലുകള്, ക്ഷേത്രങ്ങളും, പള്ളികളും ഉള്പ്പെടെ ഉള്ള ആരാധനാലയങ്ങള്, മാളുകള്, പെട്രോള് പമ്പുകള്, ആഡിറ്റോറിയങ്ങള്, സിനിമാശാലകള്, മദ്യശാലകള്, വ്യാപാരസ്ഥാപനങ്ങള് ഉള്പ്പെടെ നിത്യേന ആയിരങ്ങള് വന്നുപോകുന്ന സ്ഥാപനങ്ങള് നിലനില്ക്കുന്നുണ്ട്.
മറ്റു നഗരങ്ങളെ പോലെ അടിയന്തിര ഘട്ടങ്ങളില് ഉപയോഗിക്കാന് പാകത്തില് ഉള്ള പോക്കറ്റ് റോഡുകളോ സമാന്തരപാതകളോ ഏറെ ഇല്ലാത്ത പ്രദേശം കൂടിയാണിവിടം. അതിനാല് അപകടങ്ങളോ ജാഥകളൊ എന്തിനേറെ വിദ്യാര്ത്ഥി സമരങ്ങള് പോലും ഏറ്റവും കൂടുതല് ബാധിക്കുന്നത് നാഷണല് ഹൈവെ വഴിയുള്ള ഗതാഗതത്തെ ആണ്.
ഇതാണ് ഇവിടുത്തെ ജനങ്ങളില് ഒരു ബൈപ്പാസ് എന്ന ആവശ്യം ശക്തമാകാന് ഉള്ള പ്രധാന കാരണം. ഇതുമൂലം നഗരത്തില് കയറേണ്ട ദീര്ഘദൂര വാഹനങ്ങള് ബൈപ്പാസ് വഴിതിരിച്ചുവിട്ടാല് ഒരു പരിധി വരെ ഇവിടുത്തെ യാത്രാപ്രശ്നങ്ങള്ക്ക് പരിഹാരം കാണാന് സാധിയ്ക്കും. ഏറെ തിരക്ക് അനുഭവപ്പെടുന്ന അടൂര്, തിരുവല്ല ചെങ്ങന്നൂര്, ചങ്ങനാശേരി, കോട്ടയം, ആറ്റിങ്ങല് പോലെ ഉളള പ്രദേശങ്ങളില് ഇത്തരം ബൈപ്പാസുകള് നിര്മ്മിച്ച് ഏറെ ഫലപ്രദമെന്ന് തെളിയിച്ചിരിക്കുകയാണ്.കരുനാഗപ്പള്ളിയുടെ ഹൈവേ വികസനത്തിന് ഏറെ പ്രതിസന്ധി ഇവിടുത്തെ വസ്തുവിന്റെ ഉയര്ന്ന വില തന്നെയാണ്. മാത്രവുമല്ല, വസ്തു ഏറ്റെടുക്കുമ്പോള് അവിടെ നിലനില്ക്കുന്ന സ്ഥാപനങ്ങളുടെ നഷ്ടപരിഹാരവും, അവരുടെ പുനരധിവാസവും ഉള്പ്പെടെ നൂറുകണക്കിനു കോടി രൂപ കണ്ടെത്തേണ്ടതുണ്ട്. എങ്കിലും നിലവില് ഹൈവെ ഏറ്റെടുത്തുള്ള സ്ഥലത്ത് വേണ്ട വികസനം നടത്തുന്നതോടൊപ്പം ബൈപ്പാസ് കൂടി യാഥാര്ത്ഥ്യമായാല് കരുനാഗപ്പള്ളിയുടെ വികസന കുതിപ്പിന് ഏറെ പ്രയോജനകരമാക്കും എന്നാണ് വിദഗ്ദ്ധര് അഭിപ്രായപ്പെടുന്നത്.
ബൈപ്പാസ് നിര്മ്മാണത്തിന് കരുനാഗപ്പള്ളി റയില്വേ സ്റ്റേഷനില് നിന്നും ടൈറ്റാനിയം ഫാക്ടറിയിലേക്ക് നിര്മ്മിച്ച റയില്വെലയിന് ഉപയോഗശൂന്യമായി കിടക്കുകയാണ്. ഇത് ഏറ്റെടുത്ത് പുള്ളിമാന് ജങ്ഷനുമായി ബന്ധിപ്പിച്ചാല് ഏറെ ബുദ്ധിമുട്ടില്ലാതെ ബൈപ്പാസ് എന്നത് യാഥാര്ത്ഥമാക്കാവുന്നതുമാണ്. മാത്രവുമല്ല പുതിയ റോഡു കേന്ദ്രീകരിച്ച് പുതിയ സ്ഥാപനങ്ങള് വരികയും, ധാരാളം തൊഴിലവസരങ്ങള് ഉള്പ്പെടെയുള്ള വികസന പ്രവര്ത്തനങ്ങള്ക്ക് സഹായിക്കുകയും ചെയ്യും. ഇങ്ങനെ ഒരു ബൈപ്പാസ് വിഭാവന ചെയ്യുമ്പോള് അന്പത് വര്ഷത്തിനടുത്ത് പഴക്കമുള്ള കന്നേറ്റി പാലത്തിന് സമാന്തരമായി മറ്റൊരു പാലം എന്ന ആവശ്യം കൂടി പരിഹരിക്കപ്പെടേണ്ടതുണ്ട്. അതിനാല് കരുനാഗപ്പള്ളിയുടെ സമഗ്രവികസനത്തിനായി കക്ഷിരാഷ്ട്രീയത്തിന് അതീതമായി ചിന്തിക്കേണ്ട സമയം അതിക്രമിച്ചിരിക്കുന്നു. പദ്ധതികളുമായി വന്നാല് പണം ഒരു തടസസമാകില്ല എന്ന കേന്ദ്രഗവണ്മെന്റിന്റെ നിലപാട് ഇത്തരം വികസന സ്വപ്നങ്ങള്ക്ക് ചിറക് വയ്ക്കുന്നു.
