അയല്‍പ്പോരില്‍ ഇംഗ്ലണ്ട്

ലെന്‍സ്: പരിക്ക് സമയത്ത് ഡാനിയേല്‍ സ്റ്ററിഡ്ജ് നേടിയ ഗോളിന് ഇംഗ്ലണ്ട് വെയ്ല്‍സിനെ കീഴടക്കി. യൂറോ 2016ലെ ഗ്രൂപ്പ് ബിയിലെ മത്സരത്തില്‍ ഒന്നിനെതിരെ രണ്ട് ഗോളുകള്‍ക്കായിരുന്നു വിജയം. ഒരു ഗോളിന് പിന്നിട്ടുനിന്നശേഷമാണ് ഇംഗ്ലണ്ട് രണ്ട് ഗോളുകള്‍ നേടിയത്. വിജയത്തോടെ ഇംഗ്ലണ്ട് 4 പോയിന്റുമായി ഗ്രൂപ്പില്‍ ഒന്നാമത്.

വെയ്ല്‍സിന് വേണ്ടി 35-ാം മിനിറ്റില്‍ സൂപ്പര്‍താരം ഗരെത്ത് ബെയ്‌ലിലൂടെ ലീഡ് നേടി. 56-ാം മിനിറ്റില്‍ ജെയ്‌മി വാര്‍ഡിയിലൂടെ ഇംഗ്ലണ്ട് സമനില പിടിച്ചു. തുടര്‍ന്ന് വിജയഗോളിനായുള്ള പോരാട്ടം. ഒടുവില്‍ ഇഞ്ചുറിസമയത്തിന്റെ രണ്ടാം മിനിറ്റില്‍ സ്റ്ററിഡ്ജിലൂടെ ഇംഗ്ലണ്ടിന്റെ വിജയഗോളും.

അഞ്ചാം മിനിറ്റില്‍ വെയ്ല്‍സിന് ഒരു അവസരം ലഭിച്ചു. എന്നാല്‍ ജെയിംസ് ചെസ്റ്ററിന്റെ ഹെഡ്ഡര്‍ ഇംഗ്ലണ്ട് ഗോളി ജോ ഹാര്‍ട്ട് അനായാസം കൈയിലൊതുക്കി. തൊട്ടുപിന്നാലെ ഇംഗ്ലണ്ടിന്റെ റഹിം സ്റ്റര്‍ലിങിന് ലക്ഷ്യം പിഴച്ചു. ലല്ലാനയുടെ പാസ് സ്വീകരിച്ച് സ്റ്റര്‍ലിങ് പായിച്ച ഷോട്ട് അപകടം വിതയ്‌ക്കാതെ ക്രോസ് ബാറിന് മുകളിലൂടെ പറന്നു. 10-ാംമിനിറ്റില്‍ വെയ്ല്‍സ് സൂപ്പര്‍താരം ഗരെത്ത് ബെയ്‌ലിന്റെ ഷോട്ട് ഇംഗ്ലീഷ് പ്രതിരോധനിര താരം ബ്ലോക്ക് ചെയ്തു.

മൂന്നുമിനിറ്റിനുശേഷം വെയ്ന്‍ റൂണിയുടെ ഷോട്ടും ലക്ഷ്യം തെറ്റി പറന്നു. 26-ാം മിനിറ്റില്‍ ഇംഗ്ലണ്ടിന് വീണ്ടും നല്ല അവസരം ലഭിച്ചു. ബോക്‌സിന് പുറത്തുനിന്ന് വെയ്ന്‍ റൂണി എടുത്ത ഫ്രീകിക്കിന് ഗാരി കാഹില്‍ തലവെച്ചെങ്കിലും പന്ത്് നേരെ വെയ്ല്‍സ് ഗോളിയുടെ കയ്യില്‍. 36-ാം മിനിറ്റില്‍ വീണ്ടും ഇംഗ്ലണ്ടിന് ലീഡ് നേടാനുള്ള അവസരം. വെയ്ന്‍ റൂണി എടുത്ത കോര്‍ണറിന് സ്റ്റര്‍ലിങ് ഹെഡ്ഡര്‍ ഉതിര്‍ത്തെങ്കിലും നേരിയ വ്യത്യാസത്തിന് പന്ത് പുറത്ത്. തുടര്‍ച്ചയായ ആക്രമണ പ്രത്യാക്രമണങ്ങള്‍ക്കൊടുവില്‍ 42-ാം മിനിറ്റില്‍ ഇംഗ്ലണ്ടിനെ ഞെട്ടിച്ച് വെയ്ല്‍സിന്റെ ഗോള്‍. 35 വാര അകലെനിന്ന് സുപ്പര്‍താരം ഇടംകാലുകൊണ്ട് പായിച്ച ഫ്രീകിക്കാണ് ഇംഗ്ലീഷ് പ്രതിരോധനിരക്ക് മുകളിലൂടെ പറന്നിറങ്ങി വലയില്‍കയറിയത്. ഇതോടെ ആദ്യപകുതിയില്‍ വെയ്ല്‍സ് 1-0ന് മുന്നില്‍.

രണ്ടാം പകുതിയുടെ തുടക്കത്തില്‍ സ്റ്റര്‍ലിങിനെ പിന്‍വലിച്ച് ഡാനിയേല്‍ സ്റ്ററിഡ്ജിനെയും കെയ്‌നെ പിന്‍വലിച്ച് ജെയ്‌മി വാര്‍ഡിയെയും ഇംഗ്ലണ്ട് കളത്തിലെത്തിച്ചു. 49-ാംമിനിറ്റില്‍ എറിക് ഡയറിന്റെ ഷോട്ട് വെയ്ല്‍സ് പ്രതിരോധനിരതാരം ബ്ലോക്ക് ചെയ്തു. തുടര്‍ന്ന് ലഭിച്ച കോര്‍ണര്‍ റൂണി എടുത്തെങ്കിലും കാഹിലിന് വലയിലേക്ക് തിരിച്ചുവിടാന്‍ കഴിഞ്ഞില്ല. മൂന്നുമിനിറ്റിനുശേഷം സ്റ്ററിഡ്ജിന്റെ ഷോട്ടും ലക്ഷ്യംതെറ്റി പറന്നു. 52-ാം മിനിറ്റില്‍ ലീഡ് ഉയര്‍ത്താന്‍ വെയ്ല്‍സിന്റെ റംസിക്ക് ലഭിച്ച അവസരവും പാഴായി. 55-ാം മിനിറ്റില്‍ റൂണിയുടെ ഷോട്ട് വെയ്ല്‍സ് ഗോളി ഉജ്ജ്വലമായി രക്ഷപ്പെടുത്തി. 59-ാം മിനിറ്റില്‍ ഇംഗ്ലണ്ട് സമനില പിടിച്ചു.

പകരക്കാരനായി ഇറങ്ങിയ വാര്‍ഡിയാണ് സ്റ്ററിഡ്ജ് നല്‍കിയ ക്രോസ് വലയിലെത്തിച്ചത്. തുടര്‍ന്നും വാശിയേറിയ ആക്രമണ പ്രത്യാക്രമണങ്ങളാണ് മൈതാനത്ത് നടന്നത്. 73-ാം മിനിറ്റില്‍ ആഡം ലല്ലാനയെ പിന്‍വലിച്ച് കൗമാരതാരം റാഷ്‌ഫോര്‍ഡിനെ ഇംഗ്ലണ്ട് കളത്തിലെത്തിച്ച് മുന്നേറ്റങ്ങള്‍ക്ക് മുര്‍ച്ചകൂട്ടി. രണ്ട് മിനിറ്റിനുശേഷം ഗരെത്ത് ബെയ്‌ലിന്റെ ഹെഡ്ഡര്‍ ലക്ഷ്യം തെറ്റി പറന്നു. 80-ാം മിനിറ്റില്‍ വെയ്ല്‍സിന്റെ ജെയിംസ് ചെസ്റ്ററിന്റെ ഷോട്ട് ക്രോസ് ബാറിന് മുകളിലൂടെ പറന്നു. അവസാന മിനിറ്റുകളില്‍ ഇരുടീമുകളും മികച്ച മുന്നേറ്റങ്ങളുമായി കളംനിറഞ്ഞെങ്കിലും വിജയഗോള്‍ പിറന്നില്ല. കളി പരിക്കുസമയത്തേക്ക്. പരിക്കുസമയത്തിന്റെ രണ്ടാം മിനിറ്റില്‍ വെയ്ല്‍സിന്റെ ഹൃദയം പിളര്‍ന്ന് സ്റ്ററിഡ്ജ് വല കുലുക്കിയതോടെ വിജയം ഇംഗ്ലണ്ടിനൊപ്പം.